Qaraǵandy oblysynda «jasyl» energetıka qalaı damýda
QARAǴANDY. QazAqparat - Qaraǵandy oblysynda «jasyl» energetıka úlesin 2030 jylǵa qaraı 30% deıin jetkizý josparlanýda, dep habarlaıdy QazAqparat.
Oblys ákimdiginen málim etkendeı, óńirde jalpy qýattylyǵy 200 MVt bolatyn tórt kún elektr stantsııasy iske qosylǵan.
Balamaly energııa kózderi: Saran qalasynda (qýaty - 100 MVt), Gúlshat (40 MVt), Aqadyr (50 MVt) jáne Keńgir (10 MVt) kentterinde ornalasqan.
Sonymen qatar, óńirde Yntymaq sý qoımasynda bıogaz stantsııalary men shaǵyn sý elektr stantsııasy jumys isteıdi.
2020 jyldyń qorytyndysy boıynsha barlyq jańartylatyn energııa kózderi boıynsha jalpy ónim shamamen 300 mln kVt/saǵ qurady jáne 2019 jylmen salystyrǵanda 70,5% ulǵaıdy.
«Sondaı-aq, óńirdiń energetıkalyq kesheni bıyl taǵy bir kún elektr stantsııasymen tolyqtyrylýy tıis. Oblys ákimdigi «KAZ GREEN ENERGY» JShS-men birlesip, Balqashtaǵy «Qońyrat» shaǵynaýdanyna jaqyn jerde qýaty 100 MVt KES salý jobasyn iske asyrýda. Stantsııa jylyna 170 mln kVt elektr energııasyn óndiredi dep josparlanýda.
Іske qosýdyń birinshi kezeńiniń aıaqtalý merzimi (50 MVt) - 2021 jylǵy tamyz. Kelesi 50 MVt osy jyldyń jeltoqsan aıynda iske qosylady dep kútilýde», - dedi Qaraǵandy oblysy ákimdiginiń baspasóz qyzmetinen.
Taratylǵan aqparatqa súıensek, atalǵan kún elektr stantsııasynyń arqasynda kómirqyshqyl gazynyń shyǵaryndylary jylyna 170 myń tonnaǵa azaıady.
