Qaraǵandy oblysynda jastarǵa arnalǵan ıpoteka iske qosylmaq

QARAǴANDY. QazAqparat – Qaraǵandy oblysynda jumys isteıtin jastarǵa jeńildetilgen sharttarmen ıpoteka berý baǵdarlamasy iske qosylady. Oǵan 35 jasqa deıingi jastar qatysa alady. Óńir basshysy Jeńis Qasymbek pen «Otbasy bank» AQ Basqarma tóraıymy Lázzat Ibragımova turǵyn úı berýdiń qazirgi jáne jańa tetikterin talqylady, dep habarlaıdy QazAqparat tilshisi.

Oblys ákimi jastar úshin jeńildetilgen nesıelerdiń joqtyǵyna qatysty shaǵymdar túsetinin atap ótti. Sondyqtan Almaty úlgisi boıynsha baǵdarlama engizýdi usynýda.

Jeńis Qasymbek «Otbasy bankiniń» basshysyna jas qaraǵandylyqtarǵa turǵyn úı qaryzyn berý tetigin birlesip ázirleýdi usyndy.

Taǵy bir ıdeıa – monoqalalardaǵy shahterler men metallýrgter úshin jeńildetilgen ıpoteka berý múmkindigin jasaý. Bul baǵytta Shahtınsk, Abaı, Balqash jáne Saran qalalary nazarǵa alynýda.

Lázzat Ibragımova banktiń osyndaı baǵdarlamalardy jasaý boıynsha quraldary bar ekenin atap ótti. Sondyqtan birlesken strategııany ázirleýdi jáne ony iske asyrýdy qolǵa alý qajet.

«Otbasy banki» – iri eldi mekenderdi ǵana emes, monoqalalardy da qarjylandyratyn jalǵyz áleýmettik bank. Bizde Qaraǵandy oblysy boıynsha 200 myńǵa jýyq salymshy bar. Olardyń 12 myńnan astamy – kezekte turǵandar. Qazirdiń ózinde 10 myń salymshynyń mıllıon teńgeden astam jınaǵy bar. Bul bizdiń «Baqytty otbasy» jáne «Shańyraq» baǵdarlamalaryna qatysa alatyn áleýetti klıentterimiz», - dep atap ótti Lázzat Ibragımova.

Jyl basynan beri bank Qaraǵandy oblysy boıynsha 15 mıllıard teńge somasyna 1 300 qaryz bergen. Birjolǵy zeınetaqy tólemderiniń kómegimen 1 300-den astam otbasy qaryzdaryn merziminen buryn ótegen.

«Bizdiń kompanııa bastapqy turǵyn úı naryǵynda belsendi jumys isteıdi. 2021 jyldyń qańtar aıynan bastap 280 adam bastaýysh uıymnan páter alý úshin nesıe aldy. Onyń ishinde «Shańyraq» baǵdarlamasy boıynsha 146 kezekte turǵandar kez kelgen qurylys salýshydan alý múmkindigine ıe. Búgingi tańda biz «Baqytty otbasy» boıynsha 1 829 ótinimdi tirkedik», – dep atap ótti Bank Basqarmasynyń tóraıymy.

Lázzat Ibragımovanyń aıtýynsha, qaraǵandylyqtardyń depozıttik portfeli ǵana emes, adamdardyń bankke degen senimi de ósti.