Qaraǵandy oblysynda jastarǵa arnalǵan bıznes-ınkýbatorlar ashylady
«Búginde oblysta árbir besinshi azamat - jas urpaq ókili. Biz jastardyń naqty, ózekti máselelerin sheshýge baǵyttalǵan keshendi jospar ázirledik. Atap aıtqanda, oqytý, jumysqa ornalastyrý, bos ýaqytty paıdaly ótkizý jáne otbasylyq qundylyqtar», - dedi aımaq basshysy turǵyndarmen esepti kezdesýinde. Onyń aıtýynsha, bul júıeli jobalar bolmaq.
Erlan Qoshanov qalalyq jáne aýyldyq kolledjder bazasynda bıznes-ınkýbatorlar ashylatynyn habarlady. Ol ortalyqtarda stýdentterdi kásipkerlikke, quqyqtyq jáne qarjylyq saýattylyqqa úıretedi. Úzdik túlekter óz isin ashýǵa qoldaý alatyn bolady.
Oblys ákimi aýyl jastary erekshe nazar aýdarýdy qajet etetinin atap ótti.
«Búginde Memleket basshysy jastardy jumyspen qamtamasyz etý úshin barlyq jaǵdaıdy jasady. Biraq kóptegen jastar osy memlekettik baǵdarlamalar týraly bile bermeıdi. Bilgen kúnniń ózinde, senbeıdi. Ol memlekettik organdar tarapynan jumys jetkilikti deńgeıde júrgizilmeıtinin kórsetedi», - dedi Erlan Qoshanov.
Adamdar jumysqa ornalasý, óz bıznesin ashý múmkindikteri týraly bilýi úshin oblysta iri bazarlar men vokzaldarda jumyspen qamtý pýnktileri ashyldy. Buǵan qosa, iri eldi mekenderde de, shalǵaıdaǵy aýdandarda da mobıldi jumyspen qamtý pýnktileriniń jumysy uıymdastyrylǵan.
