Qaraǵandy oblysynda jastardy jumysqa ornalastyrý máselesi qalaı sheshilýde
Qaraǵandy oblysynyń ákimi Jeńis Qasymbektiń tóraǵalyǵymen ótken Jastar isi jónindegi keńestiń onlaın-otyrysynda NEET-jastardy jumysqa ornalastyrý, memlekettik granttar berý jáne áleýmettendirý máseleleri kóterildi.
Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekovanyń aıtýynsha, jumyspen qamtý problemalaryn sheshý úshin «Eńbek» jáne «Jumyspen qamtýdyń jol kartasy» memlekettik baǵdarlamalary qoldanylady.
Jumysshy mamandyqtary boıynsha qysqa merzimdi kýrstardan 335 adam ótti, tehnıkalyq jáne kásiptik oqýǵa 700 adam jiberildi. «Bastaý Bıznes» baǵdarlamasy boıynsha kásipkerlik negizderin 555 qaraǵandylyq tyńdap shyqty, taǵy 154-i shaǵyn nesıe aldy.
«Jastar tájirıbesine 959 adam, 194 adam sýbdııalanǵan jumys oryndaryna jumysqa ornalastyryldy. 3 myńǵa jýyq adam qoǵamdyq jumystarǵa jiberildi. Alǵashqy jumys ornymen 124 adam qamtamasyz etildi», – dedi Ásem Júnispekova.
Oblysta jastarǵa óz isin ashýǵa múmkindik beriledi. Jyl saıyn memlekettik granttar bólinedi. Bıyl olardy 343 azamat aldy. Óńirdiń 301 turǵyny Qaraǵandy oblysy ákiminiń granty úshin konkýrsqa óz ótinimderin jiberdi. 100 ótinim iriktelip alynady, jeńimpazdarǵa 1 mıllıon teńgeden beriledi.
Kezdesýge qatysýshylar qarajattyń maqsatty paıdalanylýyna baqylaýdy kúsheıtýdi jáne búgingi kúni shyn máninde ózekti bıznes-ıdeıalardy irikteýdi surady.
Oblys ákimi bul usynysty qoldap, grant túrinde bólingen qarajattyń maqsatty paıdalanylýyna monıtorıngini kúsheıtýdi, grant alýshylar men qoǵamdyq pikir kóshbasshylary komıssııasynyń qyzmetine monıtorıng júrgizýge jurtshylyqty barynsha tartýdy tapsyrdy.
«Qalalar men aýdandar ákimderine jumyspen qamtýdy úılestirý jáne áleýmettik baǵdarlamalar basqarmasymen birlesip, jastardy jumyspen qamtý salasyndaǵy memlekettik baǵdarlamalarǵa qatysýǵa tartýdy jandandyrýdy tapsyramyn», – dedi Jeńis Qasymbek.
NEET-jastar týraly da sóz boldy. Jastar saıasaty máseleleri basqarmasynyń basshysy Birjan Álimjanov jastardy jumysqa ornalastyrý ǵana emes, áleýmettendirý men ózin-ózi júzege asyrýǵa kómek kórsetýge basa nazar aýdarýdy usyndy. Qıyn jaǵdaıǵa tap bolǵan adamdar úshin psıhologtar men jattyqtyrýshylar tarapynan keńes berý úsynysy alǵa tartyldy.
