Qaraǵandy oblysynda jastar arasynda jumyssyzdyq deńgeıi tómendedi
NUR-SULTAN. QazAqparat - Qaraǵandy oblysynda ótken jylmen salystyrǵanda jastar arasyndaǵy jumyssyzdyq deńgeıi 0,5% tómendedi. Ol jaıly oblys ákimdiginde ótken apparattyq jınalys barysynda jastar saıasaty basqarmasynyń basshysy Nurjan Jetpisbaev málimdedi, dep habarlaıdy ákimdiktiń baspasóz qyzmeti.
Basqarma mamandary jumysqa ornalastyrý salasynda belsendi jumys júrgizýde. 2019 jyldyń birinshi toqsanynda jastar arasyndaǵy jumyssyzdyq deńgeıi 4,7%-dy qurady. Ótken jyldyń osy kezeńimen salystyrǵanda bul kórsetkish 0,5%-ǵa tómendedi.
Jastarǵa jumysqa ornalasýǵa jumyspen qamtý ortalyqtary úlken kómek kórsetýde. Jyl basynan beri bul mekemege 1190 adam júgingen. Onyń 267-i turaqty jumys tapty. 565 adam qysqa merzimdi oqytý kýrstaryna joldama aldy.
Aýylda jastar kásipkerligin qoldaý úshin oblys ákiminiń grantyna baıqaý ótkizilýde. 2019 jyly bul maqsattarǵa 10 mln teńge bólindi.
«Jas kásipker» jobasy aıasynda óz bıznesin bastaǵysy keletin jastarǵa 550 grant bólindi. «Bastaý Bıznes» jobasy aıasynda kásipkerlik negizderin 29 jasqa deıingi 315 adam oqyp jatyr.
Sondaı-aq, vedomstvo balalar úıiniń túlekterine turǵyn úı berý máselelerin belsendi sheshýde. Jyl basynan beri 45 jetim jańa páter kiltine ıe boldy. Olardy turǵyn úı satyp alý jónindegi memlekettik baǵdarlamalarǵa qatysýǵa belsendi túrde tartady.
- Biz turǵyn úı qatynastary salasyndaǵy memlekettik baǵdarlamalar boıynsha aqparattyq-túsindirý jumystaryna erekshe kóńil bólemiz. «Turǵyn úı qurylys jınaq banki» ókilderimen, Qazaqstandyq ıpotekalyq kompanııamen júzden astam kezdesý ótkizildi. Sondaı-aq, biz «7-20-25» jáne basqa da baǵdarlamalardyń jumys tetigin túsindiremiz. Osyndaı kezdesýlerge 3500-ge jýyq adam qatysty, - dedi Nurjan Jetpisbaev.
Nesıe alý jáne óz isin ashý, qysqa merzimdi kýrstardan qaıda ótý jáne jumys izdeýde, turǵyn úı satyp alý boıynsha kómek surap kelgen jastarǵa arnaıy qurylǵan aqparattyq toptardyń músheleri kómektesedi. Óńirde osyndaı 32 birlestik jumys isteıdi. Olar 28 myńnan astam jastarǵa keńes berdi.
