Qaraǵandy oblysynda jas ustazdardyń forýmy ótti

QARAǴANDY. QazAqparat – Qaraǵandy qalasynda jas muǵalimderdiń «Jas ustaz: tabysqa aparar jol» aımaqtyq forýmy ótti. Alǵash ret uıymdastyrylyp otyrǵan bul sharaǵa Qaraǵandy oblysynyń 130-dan astam pedagogi qatysty, dep habarlaıdy QazAqparat tilshisi.

Forým jas muǵalimder úshin pikir almasyp qana qoımaı, jetistikke jetken adamdar men óz qatarlastarynyń oıyn bilip, qyzyqtyrǵan suraqtarǵa jaýap alýǵa múmkindik beretin alańǵa aınaldy.

Sharanyń arnaıy qonaǵy retinde jetistikke jetken qaraǵandylyq belgili azamattar sóz sóıledi. Sýretshi, halyqaralyq «Atom» jobasynyń qurmetti elshisi Káripbek Kúıikov bilim berýmen qatar, oqýshylardyń boıynda meıirim, qamqorlyq sııaqty adamgershilik qasıetterdi damytýdyń mańyzyn erekshe atap ótti.

Taqyryptyq alańdarda muǵalimder bilim berýdegi basty máselelerdi talqylap, birlesip sheshim izdeýge múmkindik aldy. Jas ustazdarǵa Pedagogıkalyq sheberlik ortalyǵy mamandarynyń sabaq qurylymyn zertteý, fýnktsıonaldy saýattylyqty arttyrý, SAMR tehnologııasy sııaqty mańyzdy taqyryptar boıynsha trenıngter usynyldy. Qaraǵandy oblysynyń atynan tamyz aıynda respýblıkalyq jas muǵalimder forýmyna qatysqan pedagogter de óz bilgenin ortaǵa salyp, sabaq berýde qoldanatyn túrli ádis-tásilderin bólisti.

Al Nazarbaev Zııatkerlik mektebiniń pedagog-psıhologtary ótkizgen trenıngte muǵalimder emotsıonaldy ıntellektiniń mańyzy jaıly bilip, emotsııany taný jáne basqarýdyń joldaryn meńgerdi.

Muǵalimderdiń bilimi men biligin arttyrýǵa arnalǵan dáristerden bólek, qyzyqty ýaqyt ótkizip, demalýǵa baǵyttalǵan is-sharalar uıymdastyryldy. Jas pedagogter sporttyq oıyndar oınap, sýret salyp, fılm dybystady.