Qaraǵandy oblysynda «Jas kásipker» jobasy iske qosylady
QARAǴANDY. QazAqparat - Qaraǵandy oblysynda 24 shildeden bastap «Atameken» kásipkerler palatasynyń «Jas kásipker» bilim berý jobasy bastalady, dep habarlaıdy QazAqparat tilshisi.
Jobaǵa qatysý arqyly jastar bıznes negizderin meńgerýge, óz isin ashýǵa grattar 200 AEK (505 myń teńge) bastapqy kapıtal alýǵa, jyldyq 6%-ben 8000 AEK-ke deıingi somaǵa jeńildikti nesıe alýǵa múmkindik alady, deıdi Aımaqtyq kásipkerler palatasynyń mamandary.
Oqytý oblystyń barlyq aýdandary men qalalarynda, onyń ishinde Qaraǵandy qalasynda da ótedi. Joba naryqtyq ekonomıka jaǵdaıynda kásipkerlik qyzmetti júrgizý kezinde belgili bir uǵymdar men quzyretter sheńberin júıelendirý úshin tájirıbelik tapsyrmalardy, keısterdi, iskerlik oıyndardy qoldana otyryp, UKP ázirlegen materıaldar bazasynda ótpek.
Oqý merzimi 25 kúnnen aspaıdy. Baǵdarlamaǵa qatysýshylarǵa stıpendııa tólenedi jáne oqýdy aıaqtaǵan kezde ár qatysýshyǵa sertıfıkat tabystalady. Bul qujattyń kómegimen olar odan ári grant pen jeńildetilgen nesıe alýǵa úmitker bola alady.
Barlyq tilek bildirýshiler Qaraǵandy oblysynyń Kásipkerler Palatasynyń fılıaldaryna nemese halyqty jumyspen qamtý ortalyqtaryna, sondaı-aq eldi mekenderdiń ákimdikterine habarlasa alady. Jobaǵa qatysý úshin qatysýshylar kelesi qujattardy tapsyrýy qajet: jeke kýáliktiń kóshirmesi, mekenjaı anyqtamasy (egov.kz-ten) jáne jobaǵa qatysý úshin ótinishti toltyrý kerek. Sondaı-aq baǵdarlamaǵa qatysý úshin 22-23 shildede ótetin testileýden ótý qajet.
