Qaraǵandy oblysynda jas dárigerlerge páter beriledi
QARAǴANDY. QazAqparat - Qaraǵandy oblysynda medıtsınalyq qyzmetkerler tapshylyǵy problemasyn sheshý joly tabyldy. Jas mamandarǵa baspana beriledi, dep habarlaıdy óńir ákimdiginiń resmı saıty.
Qaı qalalarda dárigerler bıyl páter ala alatyny týraly oblystyq densaýlyq saqtaý basqarmasynyń basshysy Erjan Nurlybaev apparattyq jınalysta aıtyp berdi.
- Qaraǵandy oblysyn bilikti dárigerlermen qamtamasyz etý úshin oblystyq bıýdjetten elimizdiń medıtsınalyq JOO-da maqsatty oqytýǵa qarajat bólindi. 2017-shi jyly 273 jas maman jumysqa kiristi, onyń ishinde 46-sy rezıdentýrany aıaqtaǵan. 23 dáriger aýyldyq jerlerge baǵyttaldy. Aımaqtarda dárigerlerdiń uzaqqa qalýyn qamtamasyz etý úshin jańadan keletin mamandardy jaıly baspanamen qamtamasyz etý baǵdarlamasy júzege asyrylyp jatyr, - dedi vedomstvo basshysy.
Úlgi retinde Balqash qalasy alǵashqy boldy - 2017-shi jyly jas dárigerlerdi baspanamen qamtý úshin 18 páter jóndeýden ótti. Bul bastama dárigerler tapshylyǵyn anaǵurlym tómendetýge septigin tıgizdi. Jergilikti aýrýhanalarǵa respýblıkamyzdyń basqa oblystarynan da mamandar kóship keldi.
Bul tájirıbeni basqa da qalalar júzege asyrmaqshy. - Medıtsınalyq qyzmetkerlerge muqtaj qalalarda 2018-shi jyly jergilikti bıýdjet esebinen 60 páter jóndelip qalypqa keltiriledi, - dedi Erjan Nurlybaev. Ol atalmysh baǵdarlamany Shahtınsk, Abaı, Saran, Jezqazǵan jáne Qaraǵandy qalalary qoldaǵanyn atap aıtty. Jas dárigerlerge arnalǵan páterlerdiń kóbisi Shahtınsk qalasynda ázirlenedi - 32 páter. Qalǵan shaharlarda - 12-15 páterden.
Oblys ákimi qol astyndaǵy qyzmetkerlerine bul jaqsy bastamany barynsha keńeıtýdi usyndy. - Jas dárigerlerge qyzmettik baspana qurý kadrlar tapshylyǵy sekildi problemalardy sheshýge kómektesedi. Ásirese salalyq mamandardy ustap qalýǵa septigin tıgizedi. Barlyq ákimderge buǵan qosylyp, barynsha kómektesý kerek. Al densaýlyq saqtaý basqarmasyna bul baǵyttaǵy jumystardy belsendirek atqarýdy tapsyramyn, - dedi Erlan Qoshanov.
