Qaraǵandy oblysynda jarty jyl ishinde 6 bala terezeden qulaǵan
QARAǴANDY. QazAqparat - Jyl basynan beri Qaraǵandy oblysynda 6 bala terezeden qulaǵan, onyń ishinde tórteýi aýrýhanaǵa jetkizildi, eki sábı kóz jumdy, dep habarlaıdy QazAqparat.
Sońǵy 6 aıda TJD qyzmetkerleriniń málimdeýinshe, Qaraǵandy oblysynda alty bala terezeden qulap ketti.
8 sáýir kúni 12-shaǵynaýdanda ata-anasynyń qaraýynsyz qalǵan bala 5-shi qabattaǵy balkonnan qulap, aýrýhanaǵa jetkizildi.
2019 jyly 12 mamyrda Qaraǵandy qalasynda Kúzembaev kóshesinde 2015 jyly týǵan bala 3-qabatta ornalasqan páterdiń terezesinen abaısyzda qulap ketip, alǵan jaraqattan qaıtys boldy.
14 mamyr kúni saǵat 21.00-de eresekterdiń qaraýynsyz qalǵan 5 jasar bala 3-qabatta ornalasqan páterdiń terezesinen abaısyzda qulap, jaraqattarymen aýrýhanaǵa jatqyzyldy.
30 mamyr kúni 16-shaǵynaýdanda 2006 jyly týǵan bala abaısyzda 2-qabattyń terezesinen qulap, aýrýhanaǵa jetkizildi.
1 maýsym kúni Sátbaev qalasynda úlkenderdiń qaraýynsyz qalǵan 4 jasar bala 5 qabatty páterdiń terezesinen qulap, kóz jumdy.
2 maýsym kúni Shet aýdanynyń Aǵadyr kentinde eresekterdiń qaraýynsyz qalǵan 2016 jyly týǵan sábı abaısyzda 3-qabattyń terezesinen qulap, aýrýhanaǵa jatqyzyldy.
Eresekter men ata-analarynyń qaraýynsyz qalý - balalardyń jaraqattanýy men qaza bolýynyń negizgi sebebi, deıdi Tótenshe jaǵdaı qyzmetkerleri.
Balalardyń qaza bolý faktilerin eskere otyryp jáne terezeden qulaý sekildi jazataıym oqıǵalardyń aldyn alý maqsatynda Qaraǵandy oblysynyń Tótenshe jaǵdaılar departamenti kelesideı nusqaýlyqtarǵa qulaý túrýdi ótinedi:
1.Kishkentaı balalardy jalǵyz qaldyrmańyzdar, sebebi ata-analar balalaryn qaraýsyz qaldyrǵanda, qaıǵyly jaǵdaılar oryn alady.
2.Bala terezege kótere almaýy úshin barlyq jıhazdy terezeden alystatyp jyljytyńyzdar.
3.Eshýaqytta moskıt torǵa senim artpańyzdar! Olar balalardy qulap ketýden saqtaýǵa arnalmaǵan! Kerisinshe-moskıt tory qaıǵyly oqıǵaǵa yqpal etedi, sebebi bala ózin qaýipsiz sezinedi de, sol torǵa súıenedi. Balalar torlarmen birge qulaýy óte jıi kezdesedi.
4.Balaǵa terezeni birneshe santımetrden artyq ashýǵa múmkindik bermeıtin arnaıy bekitkishter ornatý kerek.
5.Eger siz balaǵa terezeden birdeńe kórsetseńiz, ony árdaıym myqty ustap turyńyz, balanyń shapshań qımyldaryna daıyn bolyńyz, alaqanyńyz qurǵaq bolǵany durys, balany kıiminen ustamańyz.
6. Eger sizde dál qazir saqtandyrý qurylǵysyn ornatýǵa múmkindik bolmasa, siz qajet bolǵan jaǵdaıda jáne qoldanǵannan keıin birden terezeniń tutqasyn ońaı aınaldyryp, alyp tastaı alasyz.
