Qaraǵandy oblysynda jappaı mal qyrylǵan aýyl karantınge jabyldy

QARAǴANDY. QazAqparat - Qaraǵandy oblysynyń Shet aýdany Aqshoqy aýylynda mal qyrylý deregi tirkeldi. Oblystyq veterınarııa qyzmeti aýrýdyń sebebin anyqtap jatyr. Ázirge aýyldy qorshaı karantın beketi ornatylǵan, dep habarlaıdy QazAqparat tilshisi.

Maldyń jappaı qyrylýyn Aqshoqy aýylynyń turǵyndary sońǵy on kúnde baıqaǵan.

Veterınarlar muny belgisiz sıpattaǵy ınfektsııalyq aýrý dep otyr.

Bas-aıaǵy 240 bas mal dert juqtyrǵan. Onyń ishinde resmı derekterge súıensek, 76 iri qara aram ólgen. Onyń ishinde basym bóligi - buzaýlar.

Aýyl turǵyndarynyń aıtýynsha, janýarlardyń kenetten tábeti joǵalyp, jatyp qalady.

«Ólekseler ınsınerator arqyly órteldi. Joıý jumystary aýyldyq okrýgke tıesili eski mal qorymynyń aýmaǵynda, múddeli memlekettik organdardyń, aýdandyq veterınarııalyq stantsııa mamandarynyń qatysýymen júrgizildi. Veterınarlar mal ıelerimen birlesip, aýyrǵan janýarlarǵa sımptomatıkalyq emdeý sharalaryn júrgizip jatyr», - dep habarlady Qaraǵandy oblystyq veterınarııa basqarmasynyń baspasóz qyzmeti.

Jalpy Aqshoqy aýyldyq okrýginde 2,5 myńnan astam iri qara mal bar.

Mamandar derttiń tarap ketýine jol bermes úshin aýyldyń kireberisine beket ornatty.

Aýrýdyń dıagnozyń anyqtaý maqsatynda synama alynyp, respýblıkalyq veterınarııa zerthanasynyń Qaraǵandy oblystyq fılıalyna jetkizildi.