Qaraǵandy oblysynda jańa sút-taýar fermalary paıda bolady
Aýyl sharýashylyǵy basqarmasynyń basshysy Asqar Sanaýbarov apparat keńesinde bul baǵytta taǵy qandaı jumystar atqarylyp jatqanyn málim etti.
Onyń aıtýynsha, fermalarda mal kóbeıip keledi. Bıyl jylqylar boıynsha 7% ósim kútilýde, olardyń sany 340 myń basqa jetedi. Asyldandyrý jumystaryna nazar aýdarylady. Nátıjesinde et pen sút óndirisi turaqty artyp keledi.
Oblysta sonymen qatar turǵyndardy óz ónimderimen qamtamasyz etý úshin kartop pen kókónis egý jyldan-jylǵa artyp otyr. Dándi daqyl alqaptary da kóbeıýde.
«Aýyl sharýashylyǵy ónimi óndirisiniń kólemin ulǵaıtýǵa basty nazar qoldanystaǵy óndiristerdi jańǵyrtý jáne jańa óndirister qurý jónindegi jobalardy iske asyrýǵa aýdarylady. 2023 jyly 24 ınvestıtsııalyq jobany iske asyrý josparlanǵan, onyń 10-y mal sharýashylyǵynda, 11-i ósimdik sharýashylyǵynda, 3-i qaıta óńdeýde. 4100 basqa arnalǵan 8 sút-taýar fermasy qurylatyn bolady, bul sút óndirisin jylyna 42 myń tonnaǵa ulǵaıtýǵa múmkindik beredi. Bul rette sút óńdeý kásiporyndarynyń júktemesi 77% deıin artady», – dep atap ótti Asqar Sanaýbarov.
Búginde oblysta kartop pen kókónisterge arnalǵan 134 qoıma bar. Ótken jyly úsh jańa zamanaýı kartop qoımasy engizildi, bıylǵy jyly da osyndaı qor qosylady.
Taǵy bir mańyzdy baǵyt – aýyl turǵyndarynyń tabysyn arttyrý. Ol úshin jeke qosalqy sharýashylyqtar men aýyl sharýashylyǵy kooperatıvterine jeńildikpen shaǵyn nesıe berý kózdelgen. Bıyl oblys boıynsha 653 shaǵyn nesıe berý josparlanýda, 218 ótinim kelip tústi.
«Kóktemgi egis jumystaryn ońtaıly agrotehnıkalyq merzimde aıaqtaý qajet. Mal basyn arttyrý, aýylsharýashylyq óniminiń óndirisin ulǵaıtý úshin barlyq qajetti sharalar qabyldansyn. Investıtsııalyq jobalardy josparlanǵan merzimde iske qosýdy qamtamasyz etý qajet», – dedi oblys ákimi Ermaǵanbet Bólekpaev.
