Qaraǵandy oblysynda jańa sport kesheni ashyldy
QARAǴANDY. QazAqparat - Qaraǵandy oblysynyń Abaı qalasynda jańa, úlken deneshynyqtyrý-saýyqtyrý kesheni ashyldy, dep habarlaıdy QazAqparat tilshisi.
Keshende jattyǵý zaly, kúres, voleıbol, basketbol jáne shaǵyn fýtbolǵa arnalǵan zaldar, sondaı-aq 320 oryndyq kórermen zaly bar
Kún saıyn jańa nysanda 600 adamǵa deıin jattyǵa alady. Múmkindigi shekteýli jandar úshin ústel tennısi, jeńil atletıka jáne voleıbolmen shuǵyldanýǵa jaǵdaı jasalǵan.
Sporttyq keshenniń ashylý saltanatyna Qaraǵandy oblysynyń ákimi Erlan Qoshanov pen Olımpıada chempıony, QR Mádenıet jáne sport mınıstrliginiń Sport jáne dene shynyqtyrý isi jónindegi komıtettiń tóraǵasy Serik Sápıev qatysty.
«Abaılyqtardyń erekshe maqtanar salasy qandaı? Árıne, sporttyq jetistikteri. Ótken jyly biz Abaı qalasynda basseın saldyq. Endi mine jańa DSK ashyp jatyrmyz. Keste boıynsha bul nysan jeltoqsan aıynda ǵana salynyp bitýi tıis edi. Alaıda qala turǵyndary onyń ashylýyn taǵatsyzdana kútip júrgenin eskerip, biz qurylysty merziminen buryn aıaqtaýǵa tyrystyq. Bul jerde jańa chempıondar daıarlanady dep úmittenemiz», - dedi Erlan Qoshanov.
Oblys ákimi syılyq retinde toparlyq (kent) áıelder volleıbol komandasyna jáne «Jiger» stadıonynyń fýtbol komandasyna sport jabdyqtary jıyntyǵyn tartý etti.
Serik Sápıev te jerlesterin jańa deneshynyqtyrý kesheniniń ashylýymen quttyqtady.
«Osyndaı úlken, ásem sporttyq nysandar jastardy sportpen aınalysýǵa yntalandyratynyna senimdimin. Kezinde men sporttyq mektep retinde qaıta jabdyqtalǵan qarapaıym orta mektepte oqyǵanmyn. Qazirgi tańda sport salasy jaqsy damyp, jaqsaryp jatqanyna óte qýanyshtymyn. Balalarǵa keń, zamanýı zaldarda jattyǵýǵa múmkindik berilip otyr», - dep atap ótti ol.
Jańa keshenniń jattyqtyrýshylar shtaby qazirdiń ózinde tolyq qurylǵan. Munda 20 bapker men 30 tehnıkalyq jáne ákimshilik qyzmetkerler jumys isteıtin bolady. Aldaǵy ýaqytta jańa ǵımaratqa baratyn avtobýs baǵyty da iske qosylady.
