Qaraǵandy oblysynda jańa meshit ashyldy

QARAǴANDY. QazAqparat - Aqtoǵaı aýdanyndaǵy «Aqsorań» ortalyq meshiti el ıgiligine berildi. Kıeli mekende qazyǵy qaǵylǵan meshittiń ashylý saltanatyna aýdan jurtshylyǵy kóp jınaldy, dep habarlaıdy QazAqparat tilshisi.

Taǵylymdy sharada aýdan ákimi Saltanat Ábeýova sóz sóılep, meshittiń ashylýymen quttyqtady. Sonymen birge, meshit qurylysyna belsene aralasyp, demeýshilik jasaǵan kásipkerlerge alǵys aıtty. Qaraǵandy oblystyq «Ánet Baba» meshitiniń bas ımamy Ómirzaq Bekqoja da sóz sóılep, jyly lebizin arnady.

Alla úıiniń boı kóterýine yqpal jasap, kúsh-jigerin aıamaǵan seriktestik tóraǵasyna aýyl turǵyndary men qarııalar da rızashylyǵyn bildirip, aýyl aqsaqaldary Nurjan Ibragımulyna aqboz at mingizdi.

Aıta keteıik, Aqtoǵaı aýdany ortalyǵynan boı kótergen 200 adamdyq «Aqsorań» ortalyq meshitiniń qurylysy 2018 jyldyń mamyr aıynda Nurjan Imanovtyń jáne «Aqtoǵaı ónim» JShS ujymynyń demeýshiligimen bastalǵan bolatyn.

Aýdan ortalyǵynda ornalasqan meshittiń 2 munarasy bar. Alla úıiniń qurylys sáýleti zaman talabyna saı bezendirilip, turǵyzylǵan. Meshit qurylysynyń jer aýmaǵy - 0,6 ga, ashana qurylysynyń jeri - 0,4 ga, jalpy jer kólemi - 1,0 ga.

Jalpy, qulshylyq úıinde bir mezette 200 adam namaz oqı alady. Namaz oqýǵa arnalǵan bir úlken zaly, áıelder namaz zaly, bir quran oqý jáne neke qııý bólmesi, bir ımamdar bólmesi jáne dáret alý orny bar. Meshit aýmaǵynda 250 kisige arnalǵan ashana men máıithana da qarastyrylǵan. Atalǵan meshit ǵımaraty men ashansyn jylýmen qamtý maqsatynda ortalyqtandyrylǵan jylý júıesimen qamtylǵan. Meshit sýmen, elektr energııasymen qamtamasyz etilgen.