Qaraǵandy oblysynda jańa ındýstrııalyq aımaq quryldy
QARAǴANDY. QazAqparat – Saran qalasynda burynǵy RTB zaýytynyń ónerkásiptik alańy jańa ındýstrııalyq aımaqqa aınaldy. Bul týraly Qaraǵandy oblysynyń ákimi Jeńis Qasymbek onlaın rejımde ótken oblystyq máslıhattyń kezekten tys III sessııasynda aıtty, dep habarlaıdy QazAqparat tilshisi.
«Taıaýda ǵana el basshylyǵynyń qoldaýymen burynǵy Saran qalasyndaǵy RTB zaýyty aýmaǵynda jańa ındýstrııalyq aımaq quryldy. Bul zor áleýet ashady. Investıtsııanyń jańa aǵymyn kútemiz. Mamyr aıynda avtobýs zaýytynyń ekinshi kezeńin aıaqtaý josparlanýda. Qazaqstandyq qamtý 30%-dan asady. Bul Saran qalasynyń ekonomıkasyn ártaraptandyrýǵa baǵyttalǵan alǵashqy iri joba. Reseılik «Tatneft» kompanııasymen seriktestikte shına zaýyty salynady», - dep atap ótti Jeńis Qasymbek.
Óńir basshysy osy aýdandaǵy turǵyn úı sektoryn qaıta qalypqa keltirý jospary týraly aıtty. Qaraýsyz qalǵan úılerdi jóndeý kózdelip otyr.
Depýtattar Saran qalasynyń qoldanystaǵy Bas josparyna engizilgen túzetýlerdi bekitti.
Kezekten tys sessııada 2021 jylǵa arnalǵan oblystyq bıýdjet naqtylandy. Áleýmettik saladaǵy, TKSh, kólik ınfraqurylymy jáne aýyl sharýashylyǵyndaǵy ınvestıtsııalyq jobalardy iske asyrýǵa qosymsha qarajat bólindi.
Sonymen qatar, bilim berý, densaýlyq saqtaý jáne mádenıet nysandaryn jóndeýge jáne jabdyqtaýǵa, dári-dármekpen qamtamasyz etýge qazynadan úlken kólemde aqsha jumsalady.
Jastar kásipkerligin qoldaýǵa, qoǵamdyq qaýipsizdikti qamtamasyz etýge, tabıǵatty qorǵaý is-sharalaryna jumsalatyn shyǵyndar ulǵaıtyldy. Bıýdjetten fermerlerge tyńaıtqyshtar quny óteledi.
«Búgin oblys turǵyndarynyń ál-aýqaty men densaýlyǵyn jaqsartýǵa múmkindik beretin óte mańyzdy sheshimder qabyldandy. Ótken jyly qýatty resýrstar densaýlyq saqtaýdy nyǵaıtýǵa jumsaldy. Bıyl monoqalalar men aýdandarda medıtsınalyq ınfraqurylymdy jańǵyrtý jáne kadrlar daıarlaý jónindegi jobalardy jalǵastyramyz. Basqa da máseleler - turǵyn úı qurylysy, sapaly jylý, sý jáne gazben jabdyqtaý mańyzdy bolyp tabylady», - dep atap ótti Jeńis Qasymbek.
Ol bıyl qala jáne aýyl turǵyndaryna arnalǵan turǵyn úı qurylysy tórtten bir ese ósýi tıis ekenin atap ótti. Ulytaý, Prıozersk, Abaı qalalarynda jáne Qarabas kentinde kárizdik tazartý qurylǵylarynyń qurylysyn aıaqtaý josparlanýda.
