Qaraǵandy oblysynda jańa densaýlyq saqtaý nysandary paıda boldy
Temirtaý qalasyndaǵy jańa emhanada eki qabat bar. Ol bir aýysymda 50 adamdy qabyldaýǵa arnalǵan jáne turǵyn úı massıvinde ornalasqan. Buryn adamdar dárigerlerdiń qabyldaýyna birneshe shaqyrym qashyqtyqqa barýǵa májbúr bolǵan.
- Qazirgi zamanǵy emhana Elbasynyń tapsyrmasy boıynsha «ArselorMıttal Temirtaý» AQ-nyń qatysýymen memlekettik-jeke seriktestik sheńberinde metallýrgter qalasynyń halyq tyǵyz qonystanǵan aýdanynda qadamdyq qoljetimdilik qaǵıdaty boıynsha salynǵan, - dedi Qaraǵandy oblysy Densaýlyq saqtaý basqarmasynyń basshysy Erjan Nurlybaev.
Budan basqa, Temirtaýda dene shynyqtyrý-saýyqtyrý kesheni aıaqtalý satysynda. Sport nysanyn da Elbasynyń tapsyrmasyn oryndaı otyryp, «ArselorMıttal Temirtaý» salyp jatyr. Dene shynyqtyrý-saýyqtyrý ortalyǵyn karantındik shekteýler alynǵannan keıin ashýdy josparlap otyr. Keshenge eki qabatty ǵımarat, ámbebap oıyn jáne jattyǵý zaldary, kúres zaly, 320 oryndyq kórermender trıbýnasy kiredi.
Qaraǵandy qalasynyń 11a shaǵyn aýdanynda memlekettik-jeke menshik áriptestik baǵdarlamasy boıynsha bir aýysymda 50 adam qabyldaıtyn jańa emhana iske qosyldy. Oǵan 15 myń adam tirkeledi dep josparlanýda.
Ońtústik-Shyǵys turǵyndary úshin de emhana ashyldy. Medıtsınalyq nysan bir aýysymda 150 patsıentke deıin qabyldaı alady. Qabyldaýdy 11 jalpy tájirıbe dárigeri, eki pedıatr, eki akýsher-gınekolog, terapevtik beıindegi 11 salaly maman jáne terapevtik emes baǵyttaǵy eki maman júrgizetin bolady.
Barlyq emhanalar qajetti jabdyqpen qamtamasyz etilgen, ár qaısysynda dárigerler men patsıentterge yńǵaıly bolý úshin elektrondy kezek júıesi bar.
- Qıyn jaǵdaıǵa qaramastan, jumys jalǵasýda, ómir jalǵasýda. Osy medıtsınalyq nysandardyń ashylýy bizdiń turǵyndar úshin óte mańyzdy, - dedi Qaraǵandy oblysynyń ákimi Jeńis Qasymbek.
Jańa emhanalardyń jumysy qazirgi medıtsınalyq mekemelerge júktemeni azaıtýǵa múmkindik beredi. Osynyń arqasynda óńir turǵyndary jedel jáne yńǵaıly jaǵdaıda dárigerlik kómek ala alady.
Jyl basynan beri MJÁ boıynsha Qaraǵandy oblysynda medıtsınalyq mekemelerdi irilendirý aıasynda tórt emhana ashyldy.
Aldaǵy ýaqytta Balqash qalasynda zamanaýı emhana salý, Osakarovka, Abaı jáne Qarqaraly aýdandarynda úsh gemodıalız ortalyǵyn ashý josparda bar. Sonymen qatar Qaraǵandyda radıologııa ortalyǵy onkologııalyq dıspanserde jabdyqtalýy tıis. Al 1 tamyzǵa deıin kabınet ashý tomografııa Qoıyldy.
Sondaı-aq, Temirtaýda balalarǵa arnalǵan iri ońaltý ortalyǵyn ashý jobasy iske asyrylatyn bolady. Qaraǵandyda jyl sońyna deıin eresekterge arnalǵan ońaltý ortalyǵyn paıdalanýǵa berý josparlanǵan.
