Qaraǵandy oblysynda jańa densaýlyq saqtaý nysandary ashylady
NUR-SULTAN. QazAqparat - Qaraǵandy oblysynda medıtsına – kásipkerler óz aqshalaryn belsendi jumsaıtyn salalardyń biri. Jyl basynan beri ınvestıtsııa aǵyny 1 mlrd 736 mıllıon teńgeni qurady. Sonyń arqasynda oblysta jańa densaýlyq saqtaý nysandary ashylýda, dep habarlaıdy óńirlik ákimdiktiń baspasóz qyzmeti.
Mysaly, búginde Qaraǵandy men Sátpaev qalalarynda otbasylyq densaýlyq ortalyǵy men gemodıalız ortalyǵy ashyldy. Bul eki nysan MJÁ jobasy aıasynda salynǵan.
«Bizdiń emhanada jumys qarqyndy, halyq sany da aýqymdy. Barlyǵy 82 myń adam tirkelgen. Patsıentterge dárigerdiń qabyldaýyn uzaq kútýge týra keldi, adamdar narazylyq bildiredi. Bul máseleni sheshý úshin fılıal ashtyq. Oǵan emhanadan 25 myń adam tirkelgen. Bul patsıentterdiń ózderi úshin de yńǵaıly, sebebi olarǵa kezekte otyrýdyń qajeti joq, jáne dárigerlerdiń de júktemesi azaıdy», - deıdi «Qaraǵandy qalasynyń №3 emhanasy» KMK dırektory Sánııa Boranqulova.
Jańa otbasylyq densaýlyq ortalyǵy zamanaýı jabdyqtarmen – ÝDZ, FGDS apparatymen, portatıvti elektrokardıograftarmen jáne jańa býyn defıbrıllıatorlarymen jabdyqtalǵan. Júkti áıelder men balalarǵa qyzmet kórsetý úshin bólek esigi bar arnaıy bólimshe bar. Sonymen qatar ǵımaratta 20 tósektik kúndizgi statsıonar ornalasqan. Tsıfrlandyrý da engizildi. Árbir kabınette QR-kody bar taqtaıshalar bar. Olar emdelýshilerge naqty mamannyń qabyldaý kestesin tabýǵa jáne smartfonnyń kómegimen onlaın rejımde keńes alýǵa múmkindik beredi. Ǵımaratta jeke kiretin esigi bar ana men balany qorǵaý ortalyǵy jumys isteıdi. Munda júkti áıelder men balalardy qabyldaıtyn bolady.
Sátpaev qalasyndaǵy №1 ortalyq qalalyq aýrýhana bazasynda Gemodıalız ortalyǵy ashyldy. Onyń ashylýyn jergilikti halyq kópten kútken bolatyn. Buryn emdelýshilerge Jezqazǵan gemodıalız ortalyǵyna barýǵa týra keldi.
«Gemodıalız ortalyǵynyń ashylýy – bul Sátpaev qalasy úshin memlekettik-jeke menshik áriptestik aıasynda júzege asyrylǵan óte mańyzdy jáne suranysqa ıe joba. Atalmysh ortalyqty almastyrýshy búırek terapııasyn qajet etetin 35 patsıent asyǵa kútti. Ortalyqta barlyq qajetti jabdyqtar bar», - dedi qala ákimi Asqar Ydyrysov.
Qaraǵandy oblysynda tek osy jyly ǵana MJS aıasynda tórt jańa emhana, eki konsýltatıvtik-dıagnostıkalyq ortalyq jáne kardıoońaltý ortalyǵy ashyldy. 2020 jylǵa arnalǵan eki emhana ashý jáne taǵy bir emhana salýdy bastaý jospary bar. Barlyq medıtsınalyq nysandar qalalardyń halqy qalyń eldi mekenderinde ornalasqan.
