Qaraǵandy oblysynda zańsyz qazbashylarmen kúres júrgiziledi
QARAǴANDY. QazAqparat - Qaraǵandy oblysynyń ákimi Erlan Qoshanovqa kásipkerler zańsyz qazbashylarǵa shaǵymdandy, dep habarlaıdy óńir basshysynyń baspasóz qyzmeti.
Olardyń aıtýynsha, jer qoınaýyn zańsyz paıdalaný faktileri anaǵurlym aýqymdy jáne qylmystyq sıpatqa ıe bolyp bara jatyr. Urlyqshylar tabıǵatqa zııan keltirip, eshqandaı salyq tólemeıdi, osylaısha zańdy bızneske kedergi keltirýde. Bul másele oblys ákimdigi janyndaǵy kásipkerlik jónindegi Komıssııanyń otyrysynda talqylandy.
Bul jaıt aımaǵymyzdyń qum-qıyrshyq tas qospasyn óndirýge kelisimsharttary bar kásiporyndaryna áserin tıgizýde.
- Biz bul máseleni osyǵan deıin de kótergenbiz, sońǵy ýaqytta ol kúrt shıelenisip ketti. Bul nemen baılanysty ekenin bilmeımin, biraq derekter barlyǵyn kórsetip otyr. Eger buryndary negizinen eki myń tonnaǵa deıin tapsyrystary bar mobıldi toptar áreket etse, bıyldan bastap urlaý jaıttary jappaı qylmystyq sıpatqa ıe bolyp ketti. Bul baǵytta 10-20 tonnaǵa deıingi tapsyrystardy alatyn tolyq brıgadalar áreket jasaıdy, - dedi «Impýls» JShS dırektory ıÝrıı Venchıkov.
«Zańsyz qazbashylar» resmı óndirýshilerden dempıngtik baǵa esebinen naryqtyń basym bóligin ózderine buryp otyr. Jáne olar memleket aldynda eshqandaı mindettemelerdi oryndamaıdy».
- Biz bul problema týraly bilemiz. Ol bizde jazǵy-kóktemgi maýsymda, qalalarda qurylys bastalǵan kezde paıda bolady»,- dedi Qaraǵandy oblysynyń Mamandandyrylǵan tabıǵatty qorǵaý prokýratýrasynyń prokýrory Jandos Syzdyqov. - Jyl basynda biz ǵaryshtyq sýretterdi paıdalana otyryp, jaǵdaıdy saraptadyq. Aldyn ala zańsyz jer qoınaýyn paıdalanýshy 65 ýchaskini anyqtadyq: 36 - Buqar Jyraý aýdanynda, onekisi - Qarqaraly aýdanynda, onbiri - Qaraǵandyda, úsheýi - Shahtınskide, ekeýi -Temirtaýda jáne bireýi -Abaı aýdanynda. Degenmen bul salaǵa jaýap beretin Ekologııa departamentimen nebári 4 tekseris qana júrgizilgen. Osy ýchaskilerdiń barlyǵy boıynsha olar jumys istep jatyr».
Óz pikirlerin Ekologııa departamentiniń, Jergilikti polıtsııa qyzmetiniń ókilderi men bıznesmender de bildirdi.
Nátıjesinde «zańsyz qazbalaýshylarmen» kúres júrgizýge qatysty sharalardy jasaıtyn jumys tobyn qurý sheshimi qabyldandy.
"Men barlyq memlekettik organdardy tyńdap shyqtym. Barlyq problema biryńǵaı pozıtsııa, is-áreketterdiń úılesimdigi joqtyǵynda. Sondyqtan oblys ákiminiń orynbasary Shaıdarovtyń basshylyǵymen jumys tobyn quramyz. Oǵan barlyq múddeli taraptardy engizý qajet: Tabıǵatty qorǵaý prokýratýrasy, Ekologııa departamenti, oblystyq basqarmalar, Jergilikti polıtsııa, Kásipkerler palatasy, bıznesmender. Bir aıdyń kóleminde júıeli sharalar qurý kerek. Árıne, zańsyzdyqtarmen kúresý qajet. Naqty tıimdi sharalar kerek. Olardyń nátıjesi týraly Komıssııanyń kelesi otyrysynda maǵan málimdeńizder", - dep talap etti Erlan Qoshanov.
