Qaraǵandy oblysynda volonterler 32 myń tonnadan astam qoqys jınady

QARAǴANDY. QazAqparat –Qaraǵandy oblysynda Dúnıejúzilik qorshaǵan ortany qorǵaý kúnine oraılastyrylǵan senbilik ótti. Oǵan 30 myńnan astam adam qatysty, dep habarlaıdy QazAqparat tilshisi.

Qaraǵandy oblysy boıynsha Ekologııa departamenti Tabıǵı resýrstar jáne tabıǵat paıdalanýdy retteý basqarmasymen jáne «Almighty ecology» QQ-men birlesip senbilik uıymdastyrdy. «Birge taza Qazaqstan» aktsııasy aıasynda qoqysty jınaýǵa eriktiler, memlekettik organdardyń qyzmetkerleri jáne oblystyń belsendi turǵyndary qatysty.

Qaldyqtar odan ári arnaıy uıymdarǵa tapsyrý úshin bólek jınaldy. Qoqysty shyǵarý úshin qalalar men aýdandardyń ákimdikteri tehnıkalar usyndy. Osy aýyr kólikter ruqsat etilmegen polıgondardy tazartýǵa da tartyldy.

Sondaı-aq, oblystyq Ekologııa departamenti jyl saıynǵy «Taza bolsa tabıǵat – aman bolar adamzat» respýblıkalyq baıqaýynyń qorytyndysyn shyǵardy. Bıyl atalmysh shara onlaın formatta uıymdastyryldy.

6-8 jas sanatynda Qıyn ómirlik jaǵdaıdaǵy balalardy qoldaý ortalyǵynyń tárbıelenýshisi Artem Aızenah jeńiske jetti. 9 jastan 12 jasqa deıingi balalar arasynda birinshi oryndy «Temirtaý» balalar aýylynan Symbat Saparǵalıqyzy ıelendi.

Sondaı-aq, Pıoner balalar úıiniń tárbıelenýshisi Vıoletta Kollar 13-16 jas aralyǵynda úzdik dep tanyldy.

Jeńimpazdar gramotalarmen, alǵys hattarmen jáne baǵaly syılyqtarmen marapattaldy. Sonymen qatar, olardyń fotosýretteri men sýretteri qalanyń bılbordtaryna qoıylady.