Qaraǵandy oblysynda vaktsına alǵandar shıpajaıda tegin demala alady
QARAǴANDY. QazAqparat – Qaraǵandy oblysynyń Qarajal qalasy men Jańaarqa aýdanynda koronavırýsqa qarsy vaktsına alǵandar arasynda shıpajaıǵa joldamalar men baǵaly syılyqtar oınatylýda, dep habarlaıdy QazAqparat.
Qarajalda utys oıyny 11 maýsymda bastalyp, 15 shildege deıin jalǵasady. Onyń qorytyndysy apta saıyn beısenbi kúni saǵat 16:00-de @karazhal.mso Instagram-paraqshasynda tikeleı efırde shyǵarylady. Baǵaly syılyqtar tiziminde mıkrotolqyndy peshter, mýltıpisirgishter, taǵamdyq protsessorlar jáne elektr sháınekteri bar.
«Alǵashqy nátıjeler 18 maýsymda shyǵaryldy. Utys oıynyna Qarajal men Jáırem kentiniń 150-den astam vaktsınalanǵan turǵyny qatysty. Lotereıany ótkizýdiń ashyqtyǵyn Qarajaldyń Qurmetti azamaty Meshitbaı Omarov, qalalyq máslıhat depýtaty Artem Kım jáne demeýshi kompanııanyń ýchaske bastyǵy Alekseı Kartashev baqylady. Jeńimpazdar Erkebulan Ismaılov, Aleksandra Shvab jáne Meıramgúl Bazylova boldy. Kelesi efırler 24 maýsymǵa, 1, 8 jáne 15 shildege josparlanǵan», – dep habarlady Qarajal ákimdiginde.
Kelesi utys oıynynyń qatysýshylary 18 maýsymnan keıin ekpe alatyn Qarajal jáne Jáırem turǵyndary bola alady. Olardyń tizimin baıqaý uıymdastyrýshylaryna qala men kenttiń vaktsınatsııa pýnkteri usynady.
Jańaarqa aýdanynyń vaktsınalanǵan turǵyndary arasynda «Saryaǵash» shıpajaıyna joldamalardyń utys oıyny 19 maýsymda bastaldy. Aktsııanyń maqsaty – turǵyndardy vaktsına alýǵa yntalandyrý jáne pandemııamen kúresý bolyp tabylady.
«Birinshi komponentti alý úshin vaktsınatsııa ortalyǵyna kelgen turǵyndarǵa arnaıy nómirlengen bıletter taratylady. Qatysýshy bıletti saqtap, @zhanaarkazhastary Instagram-paraqshasynda ótetin tikeleı efırge mindetti túrde qatysýy tıis. Ekpe alýshylar sany 500 adamǵa jetken kezde tikeleı efır ýaqyty qosymsha habarlanatyn bolady», – dep atap ótti Jańaarqa aýdany ákimdiginde.
