Qaraǵandy oblysynda vaktsına alǵandar sany boıynsha kósh bastaǵandar belgili boldy

QARAǴANDY. QazAqparat – Qaraǵandy oblysynda COVID-19-ǵa qarsy vaktsınatsııa naýqany jalǵasýda. Aımaqta turǵyndardy ımmýndaý boıynsha Prıozersk, Qarajal jáne Qarqaraly aýdandary kósh bastap tur, dep habarlaıdy QazAqparat tilshisi.

Prıozersk qalasynda koronavırýstyq ınfektsııaǵa qarsy vaktsınanyń birinshi komponentimen 6 153 adam egildi, ekinshisimen – 4 940 adam. Qarajalda (sonyń ishinde Jáırem kentinde) 9 132 – birinshi jáne 8 303 – ekinshi komponent aldy.

Qarqaraly aýdanynda birinshi komponentpen 12 774 turǵyn, ekinshi komponentpen – 10 653 adam vaktsına saldyrǵan.

«Qarqaraly aýdanynda vaktsınatsııa sáýir aıynda bastaldy. Bastapqyda turǵyndar vaktsına alýǵa asyqpady. Sondyqtan men halyqpen kezdesýler uıymdastyrdym, onda koronavırýstyń qaýiptiligi, ótken jyly qandaı qıyndyqtarǵa tap bolǵanymyz týraly aıttym. Birtindep adamdar vaktsınatsııalana bastady. Búgingi kúni birinshi komponentke aýdannyń eresek halqynyń 87%-y egildi», – deıdi aýdandyq aýrýhana dırektorynyń orynbasary Nazıra

Ydyrysova.

Qarqaraly aýdanynda eki vaktsınatsııa pýnkti jumys isteıdi – ortalyq aýdandyq aýrýhanada jáne Egindibulaq aýyldyq ýchaskelik aýrýhanasynda. Olar jańa muzdatqyshtarmen jabdyqtalǵan. Sondaı-aq, aýdanda tórt kóshpeli mobıldi brıgada jumys isteıdi.

«Búgingi tańda COVID-19-ben statsıonarda 15 adam jatyr. Olardyń barlyǵy vaktsınatsııalanbaǵan. Immýndalǵandardyń arasynda ınfektsııa jaǵdaılary da tirkelgen, biraq olarda koronavırýs jeńil ótýde», – dep qosty Nazıra Ydyrysova.

Qaraǵandy oblysynda 29 qyrkúıektegi jaǵdaı boıynsha vaktsınanyń birinshi komponentin - 520 078, ekinshisin 460 242 adam aldy.