Qaraǵandy oblysynda vaktsına alǵan zeınetkerler aqshalaı sertıfıkat alýda
QARAǴANDY. QazAqparat – Qaraǵandy oblysynyń kásipkerleri men qoǵamdyq qorlary «Koronavırýsty birge jeńemiz!» atty aktsııany bastady, dep habarlaıdy QazAqparat tilshisi.
Balqashtyń vaktsına alǵan zeınetkerlerine jáne Ulytaý aýdanynyń turǵyndaryna aqshalaı sertıfıkattar beriledi. Ol sertıfıkattarǵa azyq-túlik satyp alýǵa nemese kommýnaldyq qyzmetterdi tóleýge bolady.
Balqashta aktsııanyń bastamashylary jergilikti kásipkerler boldy. Olar aqshalaı qarajat bólip, azyq-túlik dúkender jelisimen, sondaı-aq zeınetkerlerdiń sertıfıkattaryn qabyldaıtyn qalanyń kommýnaldyq kásiporyndarymen kelisti.
«Sertıfıkattar vaktsınanyń birinshi komponentin alǵannan keıin birden egý pýnkterinde beriledi. Olar jalǵyzbasty zeınetkerlerge jáne eń tómengi zeınetaqysy bar adamdarǵa arnalǵan. Sondaı-aq, olardy «qant dıabeti» dıagnozymen dıspanserlik esepte turǵan qart adamdar alady. Biz táýekel tobyna jatatyn egde jastaǵy adamdardy vaktsınalaýǵa yntalandyrý úshin osyndaı aktsııany bastadyq», – dep atap ótti Balqash qalasy ákimdiginiń ishki saıasat bóliminen.
Ulytaý aýdanynda «Arsha Farand» qoǵamdyq qorynyń qolǵa laýymen vaktsınalanǵan azamattarǵa aqshalaı sertıfıkattar berý bastaldy. 5 myń teńge somasyndaǵy sertıfıkattar 65 jastan asqan vaktsınalanǵan aýdan turǵyndaryna jáne kópbalaly otbasylarǵa beriledi.
