Qaraǵandy oblysynda vahtamen jumys isteıtin jumysshylardan PTR test talap etiledi
QARAǴANDY. QazAqparat - Qaraǵandy oblysynda koronavırýstyq ınfektsııanyń taralý qaýpin azaıtý úshin vahtalyq qyzmetkerlerdiń densaýlyq jaǵdaıyna baqylaý júrgizilýde. Mindetti túrde vahtaǵa deıingi jáne aıaqtalǵan soń PTR-testileý júrgiziledi, dep habarlaıdy QazAqparat tilshisi.
«Biz ekonomıkasy kóp jaǵdaıda iri kásiporyndarymyzdyń úzdiksiz jumysyna baılanysty bolatyn ónerkásiptik óńir bolǵandyqtan, vahtadaǵy qyzmetkerlerdiń densaýlyǵyna qatań baqylaýdy saqtaý mańyzdy. Biz kásiporyndarda KVI-diń órshýine jol bermeý jáne ınfektsııany olardyń sheginen tys shyǵarmaý úshin aldyn-ala jáne vahtadan keıingi testileýdi ótkizemiz», - deıdi Jeńis Qasymbek Saryarqa telearnasynda tikeleı efırde ótken brıfıngte.
Sondaı-aq, oblystyń perımetri boıynsha negizgi magıstraldarda segiz sanıtarlyq beket ornatylǵan, onda polıtsııa qyzmetkerleri men dárigerler kezekshilik etedi. Olar júrgizýshiler men jolaýshylardyń densaýlyq jaǵdaıyn tekseredi. Baqylaý termometrııa men saýalnamany qamtıdy.
Bılik ókilderi, depýtattar jáne qoǵamdyq baqylaý kiretin 116 monıtorıngtik top óz jumysyn jalǵastyrýda.
2020 jyldyń shildesinen qarashasyna deıin 4 aı ishinde mobıldi toptar 16 715 reıd ótkizdi. 1 486 karantın talaptaryn buzýshylyq anyqtaldy. Jalpy somasy 40 mıllıon teńgeden astam 1 065 ákimshilik aıyppul salyndy.
