Qaraǵandy oblysynda úzdik otbasy tańdaldy
QARAǴANDY. QazAqparat - Qaraǵandy oblysynda úzdik otbasy tańdaldy. Osymen besinshi jyl qatarynan ótkizilgen baıqaýǵa oblystyń túrli aýdandarynan kelgen otbasylar qatysty, dep habarlaıdy óńir basshysynyń resmı saıty.
Jeńimpaz Astanada ótetin baıqaýdyń respýblıkalyq kezeńine qatysý múmkindigin alady.
«Mereıli otbasy - 2018» baıqaýynyń oblystyq kezeńiniń qorytyndysy jasaldy. Buǵan ótinimder osy jyldyń sáýirinen bastap qabyldanǵan bolatyn. Іrikteý kezeńnen Qarqaraly, Abaı, Jańaarqa jáne basqa da aýdandardyń otbasylary ótti.
Qatysýshylar arasynda kópbalaly otbasylar, eńbek áýletteri, jumys kásipteriniń ókilderi men aýylsharýashylyq kooperatıvterdiń qyzmetkerleri boldy.
- Bıylǵy jyly baıqaýǵa túrli ultty, jas jáne birneshe urpaqtardan quralǵan 200-den astam otbasy qatysty. Otbasy - ómirdegi eń mańyzdy zat, januıada úlkenge degen qurmet, otanǵa degen mahabbat, balalarǵa degen qamqorlyq, erli-zaıyptylar arasyndaǵy jaýapkershilik, balalardy ónegeli etip tárbıeleý sekildi qundylyqtardy qamtıdy. Sondyqtan memleket otbasylardy saqtap qalýǵa tyrysyp, otbasylyq qundylyqtardy dáripteıdi. Elbasy taǵaıyndaǵan «Mereıli otbasy» respýblıkalyq baıqaýy muny dáleldeıdi, - dedi óz sózinde Qaraǵandy oblysy ákiminiń orynbasary Jandos Ábishev.
Úshinshi oryndy Nura aýdanynan kelgen Nurǵalıevter otbasy ıelendi. Otaǵasy Balǵabek Nurǵalıev - eńbek ardageri, onyń jubaıy - 35 jyldyq eńbek ótili bar matematıka pániniń ustazy, jeti balanyń anasy, «Altyn alqa» ıegeri. Otbasynda 14 nemere, 10 shóbere bar.
- Bizdiń januıamyz úlken jáne óte tatý. Biz jıi bas qosyp otyramyz, barlyǵymen bólisip otyramyz. Bizdiń eń basty otbasylyq dástúrimiz - ol Naýryz meıramyn toılaý. Keń dastarhan jaıyp, basty taǵamymyz - etti ázirleımiz, ony daıyndaýǵa búkil otbasymyzben jumylamyz. Balalarymyzǵa ata-analarymyz úıretkenniń barlyǵyn jetkizýge tyrysamyz. Olardy ózimiz qandaı tárbıe kórsek, solaı ósirýge tyrysyp jatyrmyz», - dep bólisti otbasy múshesi, Prıozerskidegi órt sóndirý bóliminiń qyzmetkeri Asylbek Nurǵalıev.
Baıqaýda ekinshi oryndy Sátbaev qalasynan kelgen Áýezovter otbasy jeńip aldy. Sábıt Áýezov - 72 jasar otaǵasy, Qazaqstan Respýblıkasy Prezıdentiniń qurmet gramotasymen marapattalǵan. Onyń jubaıy - «Altyn alqa» belgisiniń ıegeri. Otbasynda 10 bala, 31 nemere jáne 14 shóbere bar. Barlyq balalar men nemereleri mýzykamen, sportpen aınalysady, kóbisi túrli medaldardyń ıegerleri jáne respýblıkalyq baıqaýlardyń jeńimpazdary.
«Mereıli otbasy - 2018» baıqaýynyń oblystyq kezeńiniń jeńimpazy Qarqaraly aýdanyna kelgen Іlimbaevtar otbasy boldy. Batyr ana Rymtaı Ábildınovanyń 19 balasy, 47 nemeresi, 13 shóberesi bar. Ol «Batyr ana» ıegeri jáne «Altyn alqa» taǵynǵan ana.
- Bizdiń otbasymyzda 11 qyz ben 8 ul bar. Shynymyzdy aıtsaq, biz bul baıqaýda jeńemiz dep oılamaǵan edik. Biraq óte qýanyshtymyz. Bul baıqaýǵa qatysý týraly oıdy kishi sińilim tastady. Bizdiń otbasymyz tatý jáne úlken. Bir oqıǵany toılaǵan kezde ózimiz ǵana meıramhanany toltyryp jiberemiz. Otbasymyzben jıi jınalamyz, merekelerdi jaqsy kóremiz. Ásirese toılar men shildehanalardy unatamyz. Jáne de Naýryzdy toılaýdy unatamyz. Toılarda úlken ápkeler kelinderge keńes beredi. Anamyz qyzdary men kelinderine qymyz daıyndaıdy, et asady, - deıdi bastaýysh synyp muǵalimi Ásem Іlimbaeva.
Syılyq retinde jeńimpazdarǵa búkil otbasy úshin shıpajaıǵa joldama berildi. Ekinshi jáne úshinshi oryn ıegerlerine estelik gramotalar men teledıdarlar tabys etildi.
Baıqaýdyń respýblıkalyq kezeńi Astana qalasynda ótedi.
