Qaraǵandy oblysynda úzdik aıtyskerler tańdaldy

QARAǴANDY. QazAqparat - S.Seıfýllın atyndaǵy Qaraǵandy ​​oblystyq akademııalyq drama teatrynda «Armysyń, áz Naýryz!» dástúrli aqyndar aıtysy ótti. Іs-shara úsh mańyzdy mereıtoıǵa: Alash Orda kósemi Álıhan Bókeıhanovtyń 155 jyldyǵy, memleket jáne qoǵam qaıratkeri, qazaqtyń tuńǵysh professor-matematıgi Álimhan Ermekovtiń 130 jyldyǵy jáne memleket qaıratkeri, Alash Orda úkimetiniń múshesi Jaqyp Aqbaevtyń 145 jyldyǵyna oraılastyryldy, dep habarlaıdy QazAqparat tilshisi.

Aıtys eki kezeńnen turdy. Mýzykalyq-poetıkalyq baıqaýdyń ekinshi aınalymyna alty jup ótti. Qaraǵandy, ​​Temirtaý, Sátbaev qalalary men Buqar jyraý, Qarqaraly, Nura aýdandarynan kelgen aıtyskerler óz sheberlikterin kórsetti.

Sonymen qatar kórermender Qalı Baıjanov atyndaǵy kontserttik birlestik ártisteri - túrli respýblıkalyq baıqaýlardyń laýreattary Medet Osataev pen Aınur Dáýletbaevanyń, sondaı-aq «Qýanysh» úlgili horeografııalyq ansambliniń ónerin tamashalady.

Úzdik aıtyskerlerdi halyqaralyq jáne respýblıkalyq aıtystyń jeńimpazdary tańdady.

Nátıjesinde Bas júldeni qaraǵandylyq Tórehan Sovet jeńip aldy. Birinshi oryn Qarqaraly aýdanynan kelgen Bekarys Ospanovqa buıyrdy, ekinshi oryndy Buqar jyraý aýdanynyń aqyndary Doskeı Botpaı men Nurlybek Tóken bólisti, úshinshi orynda Sátbaev qalasynyń aqyny Abzal Maqash pen Temirtaý qalasynan kelgen Janarys Tileýbek.

Sondaı-aq arnaıy marapattar da boldy. Temirtaýlyq Erkeǵalı Bekbolat Álıhan Bókeıhanov atyndaǵy dıplommen, qaraǵandylyq Nursultan Rymbaı Álimhan Ermekov atyndaǵy dıplommen jáne Nura aýdanynan kelgen Jandos Baqytuly Jaqyp Aqbaev atyndaǵy dıplommen marapattaldy. Qalǵan qatysýshylarǵa alǵys hattar tabystaldy.

Jeke kásipker Venera Isına aıtystyń eń jas qatysýshysy Mádı Oljabaıǵa 20 myń teńgeniń sertıfıkatyn tabystap, Doskeı Botpaıulyny ıyǵyna shapan japty.

Aıtystyń uıymdastyrýshylary - Qaraǵandy ​​oblysynyń mádenıet, arhıvter jáne qujattama basqarmasy, oblystyq mádenı-saýyq jáne halyq shyǵarmashylyǵynyń ǵylymı-ádistemelik ortalyǵy, «Arqa» aıtys aqyndary men jyrshy-termeshiler mektebi.