Qaraǵandy oblysynda úzdik aýyl ákimi belgili boldy

QARAǴANDY. QazAqparat – Qaraǵandy oblysynda «Úzdik aýyl ákimi» baıqaýynyń qorytyndysy shyqty. Qarqaraly aýdany Balqantaý aýyldyq okrýginiń basshysy Aslan Rahymbergenov jeńiske jetti, dep habarlaıdy QazAqparat tilshisi.

«Úzdik aýyl ákimi» respýblıkalyq baıqaýynyń óńirlik kezeńin Qaraǵandy oblysy boıynsha memlekettik qyzmet isteri departamenti uıymdastyrdy.

Konkýrsqa ótinimder Qarqaraly, Nura, Osakarov jáne Shet aýdandarynyń aýyl ákimderinen kelip tústi.

Qatysýshylar komıssııa nazaryna aýyl turǵyndarynyń ómirin jaqsartýǵa baǵyttalǵan óz jobalaryn usyndy jáne olarǵa senip tapsyrylǵan aýmaqtardyń áleýmettik-ekonomıkalyq problemalaryn sheshý áleýeti týraly baıandady.

Komıssııa músheleri qatysýshylardyń portfolıosyn, jobalaryn zerdelep, Qarqaraly aýdany Balqantaý aýyldyq okrýginiń ákimi Aslan Rahymbergenovti jeńiske laıyq dep tapty.

«Qarqaraly aýdanynyń týmasymyn. Eki joǵary bilimim bar. Ekologııa, ekonomıka jáne bıznes bakalavry. Eńbek jolymdy Qarqaralydaǵy akademık O. A. Jáýtikov atyndaǵy № 1 orta mektebinde ekologııa pániniń muǵalimi, AÁD jáne uıymdastyrýshy pedagog bolyp bastadym. Sodan keıin aýdannyń bilim, dene shynyqtyrý jáne sport bóliminiń ádiskeri, bas mamany bolyp jumys istedim, aýdandyq jastar resýrstyq ortalyǵynyń basshysy boldym. 2020 jyly Balqantaý aýyldyq okrýginiń ákimi bolyp saılandym», – deıdi Aslan Rahymbergenov.

Ákim qyzmetindegi alǵashqy jyly Aslan Rahymbergenov turǵyndardy uıaly baılanyspen jáne ınternetpen qamtamasyz etti.

Ótken jyly uzyndyǵy 9,6 km Qarabulaq aýylyna kireberis joldy jóndeý bastaldy.

«Bul - aýdandyq mańyzy bar jol. Onyń jaǵdaıy óte jaman edi. Osyǵan baılanysty Egindibulaqqa qatynaıtynn avtobýstar bizge burylmaıtyn. Turǵyndar keıde aýylǵa deıin 9 shaqyrymnan astam joldy jaıaý júrýge májbúr bolady. Ótken jyly biz 1,8 km jóndedik. Bıyl jumysty aıaqtaýdy josparlap otyrmyz», – dep atap ótti ákim.

Bolashaqta aýyldyq okrýg basshysy Aınabulaq bólimshesine deıin greıderlik jol salýdy kózdep otyr. Onyń uzyndyǵy – 5,7 km.

«Qysta boran soqqan kezde Aınabulaq únemi qar qursaýynda qalady. Adamdarǵa obal. Baıqaýdyń respýblıkalyq kezeńinde jeńiske jetsem, jol salý úderisi jedeldeıdi. Baıqaý erejesine sáıkes jeńimpazǵa bir jobany júzege asyrýǵa kómek kórsetiledi», – dedi ákim.

Sondaı-aq, Balqantaý aýyldyq okrýginde ákimniń bastamasymen kásipkerlikti damytý úshin grant beretin boldy.

Grant qarajatyn sharýa qojalyqtarynyń basshylary bóledi.

Osynyń arqasynda ótken jyly eki bastaýshy kásipker qarjylaı qoldaý aldy. Olar naýbaıhana men atele ashty.