Qaraǵandy oblysynda úıindi astynda qaza tapqandar jerlenedi
QARAǴANDY. QazAqparat - Qaraǵandy oblysynda seısenbi, 3 jeltoqsanda Shahanda qulaǵan úı úıindisiniń astynda qalǵandardyń birin sońǵy saparǵa shyǵaryp salady, basqalary 4-7 jeltoqsanda jerlenedi, dep habarlady oblys ákiminiń baspasóz qyzmetine silteme jasap «QazAqparat» HAA tilshisi.
«Valerıı Mıhaılovty jerleý búgin Sarept kentinde ótedi. 60 jastaǵy er adam «KAREM» JShS-da jumys istegen. Artynda jubaıy men uly qaldy», - dedi oblys ákiminiń baspasóz qyzmetinde.
Galyshevtar otbasynyń eki múshesi 4 qańtarda Shahan kentindegi zıratqa jerlenedi. 5 qańtarda Shahanda úsh adam ajal qushqan Andropovtar otbasymen qoshtasady. Zeınetker Tatıana Kan 6 qańtarda Vosmmıdomıkı kentindegi zıratqa jerlenedi. Rojdestvo merekesi kúni, 7 qańtarda Shahan zıratyna Elena Alekseenko ulymen birge jerlenedi.
Eki qaza tapqan er adam «Tentek» jáne «Shahtınskaıa» shahtalarynda jumys istegen. Eki mert bolǵan áıel dekrettik demalysta bala kútimimen aınalysqan.
Budan buryn habarlanǵandaı, oblysynyń bılik ókilderi Shahan kentinde qulaǵan kópqabatty úıdiń zardap shekken jáne qurban bolǵan turǵyndarynyń otbasylaryna materıaldyq kómek kórsetedi, «Mert bolǵan otbasynyń árbir múshesine 1 mıllıon teńge materıaldyq kómek kórsetiledi. Aýrýhanada jatqan, zardap shekkender úshin 500 myń teńgeden tólenedi»,-dedi oblys ákiminiń baspasóz qyzmetiniń jetekshisi Álııa Syzdyqova.
Ákimdik qaıtys bolǵandardy jerleý men as berý shyǵyndaryn óz moıyndaryna alady. Buǵan qosa tıisti zańnamaǵa sáıkes, arnaıy komıssııa jumysynyń sheshimimen keltirilgen shyǵyn bıýdjetten tólenedi.
Aıta keteıik, 1 qańtar kúni 22 saǵat 40 mınýt shamasynda Qaraǵandy oblysynyń Tótenshe jaǵdaılar departamentine Shahan kentinde kópqabatty úıdiń qulaǵany jóninde arnaıy habar kelip túsken. Oqıǵa ornynan tótenshe jaǵdaılar qyzmetiniń kúsh-qurylymdary men arnaıy tehnıkalary jóneltilip, turǵyndardy evakýatsııalaý jumystary júrgizildi. Shahan kentiniń ákimdigi janynan 8 (72156) 3-24-17 nómiri boıynsha, jedel jeli qyzmeti uıymdastyryldy.
Qıraǵan úıdiń úıindilerinen 9 adamnyń máıiti tabyldy. Olardyń 3-ýi er adam, 3-ýi áıel adam, taǵy úsheýi balalar. Resmı tizimdi Qaraǵandy oblysynyń tótenshe jaǵdaılar qyzmeti usyndy. Qurban bolǵandardyń arasynda 2016 jyly týǵan eki náreste bar. 32 jasar er azamat úıindilerdiń astynan aman shyqty.
Úıdiń qulaýyna 4-shi podezdiń jertólesinde ornalasqan qazandyqtyń jarylýy sebep bolǵan. Qulaǵan úı 1987 jyly salynǵan. Apat bolǵan podezde 10 páter bolǵan. Ákimdiktiń málimetteri boıynsha, úıde 118 adam turyp jatqan. Qulaǵan podezde 25 turǵyn, qonaqtardy qosa alǵanda shamamen 30 adam bolǵan.
Shahandyqtar ortalyqtandyrylǵan jylý júıesi bolmaǵandyqtan jylý máselesin ózderi sheshken. Bılik ókilderiniń málimetterinshe, jańa qazandyq salý jospary 2013 jylǵa qoıylǵan. Joba-smetalyq qujattar daıyndalǵanymen qarjy máselesi qolbaılaý bolyp kelgen.
Qazaqstan Respýblıkasynyń Prezıdenti Nursultan Nazarbaev Qaraǵandy oblysynyń Shahan kentinde bolǵan tótenshe jaǵdaıǵa baılanysty kóńil aıtty. Elbasy Qaraǵandy oblysynyń ákimine, sondaı-aq ýákiletti memlekettik organdarǵa zardap shekken turǵyndardyń bárine jan-jaqty kómek kórsetý úshin tıisti sharalar qabyldap, tótenshe oqıǵanyń sebebin anyqtaý jóninde tapsyrma berdi.
