Qaraǵandy oblysynda ustazdardan medıator daıarlap shyǵarady
QARAǴANDY. QazAqparat - Qaraǵandy oblysynda pedagogtarǵa medıatsııa daǵdylaryn úıretý boıynsha pılottyq joba iske qosyldy, dep habarlaıdy QazAqparat tilshisi oblystyq bilim basqarmasynyń baspasóz qyzmetine silteme jasap.
Arsana respýblıkalyq qoǵamdyq birlestiginiń ókilderi bilim berý qyzmetkerlerine qaqtyǵysty jaǵdaılardaǵy qıyndyqtardy sheshýdiń ádis-tásilderin úıretpek.
«Qaraǵandy oblysynyń bilim uıymdaryna medıatorlar daıarlaý isinde yntymaqtastyq jasaý maqsatynda memorandýmǵa qol qoıdyq. Medıatsııa arqyly kez kelgen máseleni der kezinde sheshýge bolady. Biraq ony úıretý kerek», - deıdi oqý-ádisteme basqarmasynyń dırektory Gúlsim Qojahmetova.
Arsana RQB ókili Rysty Jumabekovanyń aıtýynsha, kásibı medıatorlar pedagogtarǵa qaqtyǵystardy sheshý joldaryn tabýǵa kómektesedi.
«Qaraǵandy oblysynyń bes mektebinde dıagnostıka júrgizemiz. Derekterdi taldap, jaǵdaıdy ońaltý úshin ne nársege nazar aýdarý qajettigin aıtamyz. Semınar qorytyndysy retinde pedagogtarǵa jalpy medıatsııamen aınalysýǵa jaǵdaı jasaıtyn qujat beriledi», - deıdi Rysty Jumabekova.
Budan tys, keıbir qatysýshylar trener sertıfıkatyn alyp, basqa bilim mekemelerinde medıator daıarlaýyna bolady.
