Qaraǵandy oblysynda úsik shalǵan segiz adam aýrýhanaǵa jetkizildi
QARAǴANDY. QazAqparat - Qaraǵandy oblysynda 4 jáne 5 aqpanda úsik shalǵan segiz adam medıtsınalyq kómekke júgingen. Olardyń altaýy aýrýhanaǵa jatqyzyldy, ekeýi ambýlatorly túrde em alyp jatyr, dep habarlaıdy QazAqparat tilshisi.
Buǵan qosa Qaraǵandy oblysynda ótken táýlikte 5 adam aıaz qursaýynan qutqaryldy.
«Buqar Jyraý aýdanynda Aqtaý kentinen 8 shaqyrym qashyqtyqta TJD qyzmetkerleriniń kómegimen jolda buzylyp qalǵan «Gazel» avto kóliginen 1 adam qutqarylyp, Temirtaý qalasyna jetkizildi. Sondaı-aq, Ulytaý aýlynan 12 shaqyrym qashyqtyqta TJB jáne jergilikti atqarý organdarynyń qyzmetkerleri qar qursaýynda qalǵan «Nıva» kóliginen 4 adamdy evakýatsııalaǵan. Qutqarylǵan adamdarǵa medıtsınalyq kómek qajet bolmady», dep málimdedi Qaraǵandy oblysy TJD baspasóz qyzmeti.
6 jáne 7 aqpanda túnde óńirde -37-42 gradýsqa deıin qatty aıaz túsedi. Keı jerlerde, kóbinese oblystyń soltústiginde, aýa temperatýrasy 45 gradýsqa deıin tómendeıdi.
Qaraǵandy oblysynyń qutqarýshylary men medıtsına qyzmetkerleri bul kúnderi jyly kıinip, qajet bolmaǵan jaǵdaıda dalaǵa shyqpaý kerektigin eske salady.
Deneni úsik shalǵanyn kelesi nyshandar boıynsha anyqtaýǵa bolady: dene temperatýrasynyń tómendeýi, qaltyraý, keıde teride kógergen daqtardyń paıda bolýy, uıqynyń kelýi. Ekinshi, úshinshi jáne tórtinshi dárejeli úsik shalý kezinde ekinshi-úshinshi kúni teri kúldirep, úsken jerde teri jansyzdana bastaıdy.
Úsik shalǵan bette zardap shegýshini dereý jyly jerge ornalastyrý qajet. Eger jaı muzdaǵan bolsa, úsken teri bólikterin jyly lebińizben jylytyp, sál ýqalaý qajet, sonan soń dákemen tańyp tastaǵan jón. Úsigen terige maı nemese jaqpa maılar jaǵýǵa bolmaıdy. Al eger úsik qatty shalǵany baıqalsa jáne zardap shegýshi qatty aýyrtpalyq sezinse, ony jyly jerge ornalastyrǵan bette jedel járdem shaqyrý kerek.
