Qaraǵandy oblysynda úsh qaladaǵy bastaýysh synyp oqýshylary qashyqtan oqytýǵa kóshedi
QARAǴANDY. QazAqparat - Jezqazǵan, Qaraǵandy, Temirtaý qalalarynyń 1-5 synyp oqýshylary qashyqtan bilim alý formatyna aýystyrylady. Bul sharalar sanıtarlyq-epıdemıologııalyq baqylaý departamenti usynysymen qabyldanyp otyr, dep habarlaıdy QazAqparat tilshisi.
«Bilim alýshylar men tárbıelenýshiler jáne bilim berý qyzmetkerleri arasynda koronavırýstyq ınfektsııa aýrýynyń ósýine jol bermeý maqsatynda jáne sanıtarııalyq-epıdemıologııalyq baqylaý departamentiniń usynymy negizinde 2021 jylǵy 26 sáýir men 10 mamyr aralyǵynda Jezqazǵan, Qaraǵandy, Temirtaý qalalarynyń 1-5 synyp oqýshylary qashyqtan oqytý formatyna aýystyrylady, 9-11 synyptar shtattyq rejımde oqıdy», - dep habarlady Qaraǵandy oblysy bilim basqarmasynyń baspasóz qyzmeti.
Sondaı-aq, vedomstvoda Jezqazǵan qalasynyń 4 aýyldyq mektebi shtattyq rejımde oqýyn jalǵastyratyny týraly málim etti. Oblystyń basqa óńirlerinde oqytý burynǵy rejımde ótýde.
