Qaraǵandy oblysynda úsh adam oq jaraqatymen aýrýhanaǵa tústi
ShAHTINSK. QazAqparat – Qaraǵandy oblysynyń Shahtınsk qalasynda janjal barysynda úsh er adam oq jaraqatyn aldy, dep habarlaıdy QazAqparat tilshisi.
24 qańtar kúni Shahtınsk qalasyndaǵy dámhanalardyń birinde qonaqtar arasynda janjal týyndaǵan. Saldarynan 33-53 jas aralyǵyndaǵy qalanyń úsh turǵyny oq jaraqatymen aýrýhanaǵa jatqyzyldy.
Atalǵan derek boıynsha QR QK-niń 293-baby 3-bóligimen qylmystyq is qozǵaldy.
«Polıtsııa qyzmetkerleri 28 jastaǵy qala turǵynyn izin sýytpaı ustady. Ol buzaqylyq nıetpen travmatıkalyq qarýdan oq atqanyn moıyndady. Ustalǵan azamat ýaqytsha ustaý abaqtysyna qamaldy. Tergeý júrip jatyr», - dep habarlady Qaraǵandy oblysy Polıtsııa departamentiniń baspasóz qyzmetinen.
