Qaraǵandy oblysynda UOS ardagerleri men zeınetkerlerdiń áleýmettik kartasy jasaldy
QARAǴANDY. QazAqparat - Qaraǵandy oblysynyń jastar saıasaty máseleleri jónindegi basqarmasy UOS ardagerleri men zeınetkerlerdiń áleýmettik kartasyn ázirledi. Osynyń arqasynda olar qajetti kómekti tezirek ala alady. Osy jáne basqa da bastamalar Búgin Qaraǵandy oblysynyń ákimi Jeńis Qasymbektiń tóraǵalyǵymen onlaın-rejımde ótken jastar keńesinde talqylandy, dep habarlaıdy QazAqparat tilshisi.
2020 jyl Qazaqstandaǵy eriktiler jyly bolyp jarııalandy. Pandemııa kezinde eriktiler úlken ról atqardy – olar az qamtylǵan otbasylarǵa, múgedekterge, ardagerlerge jáne jalǵyz basty zeınetkerlerge kómektesti. COVID-19 ekinshi tolqyny paıda bolǵan jaǵdaıda olar jumysyn jalǵastyrýǵa daıyn.
«Koronavırýstyń ekinshi tolqyny jaǵdaıynda eriktiler kómektesýge daıyn ekenin aıtqym keledi. Bizdiń oblysta 57 UOS ardageri, 8 100 tyl eńbekkeri jáne 206 myń zeınetker turady. Olardyń árqaısysy úshin áleýmettik karta jasaldy. Osyǵan baılanysty halyqtyń osy sanatyna kómek kórsetý úshin 3 myńǵa jýyq erikti tartylady», - dedi Qaraǵandy oblysynyń jastar saıasaty máseleleri basqarmasynyń basshysy Nurjan Jetpisbaev.
Jıynda sondaı-aq patrıottyq tárbıe týraly aıtyldy, bul rette «Jas Sarbaz» jastar birlestigi erekshe ról atqaratyny tilge tıek etildi. Oblysta barlyǵy 19 synyp jumys isteıdi, onda osy qozǵalystyń 457 qatysýshysy oqıdy. Olardyń arasynda sporttyń ár túrinen Qazaqstan chempıondary men «Aıbyn»áskerı-patrıottyq jıynyna qatysýshylar bar.
Іs-sharada «Álem arqyly» qoǵamdyq jastar qorynyń kóshbasshysy Danııar Qurmanov ta sóz sóıledi. Ol Jeńis Qasymbekten «Mektep synybynyń aǵashy» bastamasyn qoldaýdy surady. Atalmysh joba aımaqtyń ár mektebindegi barlyq synyptar bir aǵash otyrǵyzyp, kóshetter tamyr alǵanǵa deıin olarǵa qamqorlyq jasaýdy qarastyrady. Bul oblystaǵy jasyl jelekterdiń sanyn 10 myńǵa arttyrýǵa kómektesedi.
Keńes qatysýshylary sondaı-aq digital salasynda qashyqtyqtan jumyspen qamtýdy jáne qosymsha bilim berýdi damytý jónindegi bastamalardy da atap ótti. Tárbıe berýdegi dástúrli mádenı qundylyqtardyń mańyzdylyǵyn jáne qazirgi qoǵamnyń damýyndaǵy til saıasatynyń mańyzdylyǵyn atap ótti.
«Biz eriktiler jylyn osylaı ótetinin elestete almadyq dep oılaımyn. Úlken urandar, forýmdar men konferentsııalarsyz, jeńderin túrip, eriktiler adamnyń kúndelikti is-áreketterimen eriktiler qozǵalysyna óz úlesterin qosýda. Barlyq erikti kúshterdiń shoǵyrlanýy burynǵydan da paıdaly boldy. Pandemııa kezindegi eriktilerdiń rııasyz jumysynyń arqasynda biz kóptegen áleýmettik máselelerdi sheshe aldyq», - dedi Jeńis Qasymbek.
Onlaın-kezdesý sońynda oblys ákimi qaıyrymdylyq aktsııalaryna qatysyp, pandemııa kezinde muqtaj jandarǵa belsendi kómek kórsetkenderdiń barlyǵyna alǵysyn bildirdi.
