Qaraǵandy oblysynda Ulttyq bank ınkassatorlaryna shabýyl jasaǵandar ótken jylǵy dál osyndaı oqıǵaǵa qatysy bar dep kúdik keltirilip otyr
ASTANA. Qazannyń 20-sy. QazAqparat /Marlan Jıembaı/ - Qaraǵandy oblysynda Ulttyq bank ınkassatorlaryna shabýyl jasaǵandar ótken jylǵy dál osyndaı oqıǵaǵa da qatysy bar dep kúdik keltirilip otyr. Bul týraly QR ІІM resmı ókili Qýanyshbek Jumanov búgingi baspasóz máslıhaty barysynda málim etti.
QR ІІM-niń jáne Qaraǵandy oblystyq ІІD-niń qyzmetkerlerinen kurylǵan jedel-tergeý toby Shahtınsk qalasynda bank ınkassatorlaryna karaqshylyq shabýyl jasaǵan adamdardy tergeý kezinde olardyń ekeýiniń ótken jyly Qaraǵandydaǵy basqa banktiń fılıalyna qarýly shabýyl jasaǵandary úshin de kúdikti ekenin anyqtady», - dedi resmı ókil.
Q.Jumanovtyń sózine qaraǵanda, ótken jyldyń naýryz aıynda olardyń ınkassator tonamaq bolǵan áreketteri júzege aspaı qalǵan edi. Sonymen qatar olar oqıǵa ornynda birqatar aıǵaqtar, onyń ishinde qan izderin qaldyrǵan.
«Qazirgi ýaqytta ustalǵandardyń kinásin moıyndaýlaryn bekitý úshin birqatar saraptamalar taǵaıyndaldy», dedi ol.
Esterińizge sala keteıik, qazannyń 12-sinde Qaraǵandy oblysy Shahtınsk qalasynda Halyq bankiniń ınkassator kóligine qarýly shabýyl jasalǵan bolatyn. Polıtsııanyń aqparaty boıynsha, shabýyl jasaǵandardyń sany úsheý bolǵan. Qaraqshylarǵa ınkassatorlar da oq atyp qorǵanǵandyqtan, qaskúnemder aqsha ala almaǵan. Alaıda ınkassatorlardyń bireýi jaralanǵan edi. Al qaraqshylar jasyrynyp úlgergen avtokólik Novodolınka kentiniń janynan memlekettik nómeri alynyp tastalyp, órtengen qalpynda tabyldy. Qazannyń 15-inde kúdiktilerdiń barlyǵy qolǵa tústi.
