Qaraǵandy oblysynda TJ kezinde halyqqa kómektesetin 130 volonter oqytyldy

QARAǴANDY. QazAqparat - «Qyzyl jarty aı qoǵamy» qoǵamdyq birlestigi Qaraǵandy oblystyq fılıaly óńirdiń Tótenshe jaǵdaılar departamentimen birlesip 130 eriktini oqytyp shyǵardy. Nátıjesinde tótenshe jaǵdaılar kezinde halyqqa kómek kórsetetin 25 mobıldi volonterlik komanda quryldy.

Mobıldi toptardy qamtý geografııasy keń – Osakarov, Buqar Jyraý jáne Shet aýdandary, sondaı-aq Qaraǵandy qalasyn quraıdy.

«Biz aýdandardy kezdeısoq tańdaǵan joqpyz. Olardyń barlyǵy tótenshe jaǵdaılarǵa beıim. Bul eldi mekenderde sý tasqyny men sý basyp ketý jıi kezdesedi. Aldymen eriktiler daıyndyqtan ótti. Osydan keıin olar kent turǵyndary úshin onlaın-oqytý ótkizdi. Bul árbir eldi meken úshin táýekel kartasyn ázirleýdi jáne zerdeleýdi bildiredi», – dedi «Qyzyl jarty aı qoǵamy» QB Qaraǵandy oblystyq fılıalynyń basshysy Tatıana Abramova.

Alty aı ishinde mobıldi komandalar birqatar reıd jáne aktsııa ótkizdi. Olar TJ jaǵdaıyna arnalǵan is-qımyldardyń egjeı-tegjeıli nusqaýlyǵymen otbasylar úshin 116 jospar qurdy. Jobamen 50 myń adam qamtyldy.