Qaraǵandy oblysynda turǵyndardy áýrege salǵan eski úı jóndeletin boldy

QARAǴANDY. QazAqparat - Abaı qalasynda shatyry jóndeý kórmegen úıdiń tóbesinen jaýyn jaýsa boldy, sý sorǵalap, turǵyndardy ábigerge salady, dep habarlaıdy QazAqparat 24.kz silteme jasap.

Alańdaǵan jurt endi tozyǵy jetken turǵynjaı apatty dep tanylyp, baspanasyz qalamyz ba dep ýaıymdap otyr. Oǵan sebep te joq emes. Abaı qalasynda osydan 4 kún buryn jaýyn seldetip, turǵyndardy ábden ábigerge saldy. Úılerdiń tóbesinen sý sorǵalap tur. Mynaý ǵımarattyń kireberesi ǵana. Al páterdiń ishi adam kórgisiz.

Lıýbov Lıtvınovanyń úıinde tilshilerimiz osydan toǵyz aı buryn bolǵan edi. Sol kezde de jańbyr sýy shatyrdan ishke ótip, otbasyn ábden ábigerge salǵan. Qazir de ózgergen eshteńe joq. Tóbeden sorǵalaǵan sýdyń saldarynan jıhaz ben túsqaǵaz búlingen. Tipti, úı ishinde órt shyǵa jazdapty. 

«Symdar tuıyqtalyp, ushqyn paıda boldy. Saldarynan jaryqty óshirip tastap, elektr jelisin aýystyrdyq. Bul oqıǵa kúndiz boldy. Al túnde ot shyqsa qaıter edik?! Kishkentaı balalar bar. Qorqynyshty»,-deıdi turǵyn Lıýbov Lıtvınova. 

Bul páterdegi jaǵdaı kópqabatty úıdiń barlyq turǵyndaryna jaqsy tanys. Ondaǵan otbasy uzaq ýaqyt boıy jóndeý kórmegen shatyrdan zardap shegip otyr. Tóbeden aqqan sýdan qabyrǵalar kógergen. Sonyń saldarynan keı turǵyndardyń tynysy taryla bastapty. 

«Eki balam bar. Qazir atasy men apasyna demalysqa ketti. Únemi aýyrady», - deıdi taǵy bir turǵyn Erkegúl Suraýhan.

«Qanshama ret ákimdikke de bardyq. Bárine aıttyq. «Áne isteımiz, mine isteımiz» dep sozbaqtaýmen kele jatyr», - deıdi Serikbol Qýanhan esimdi turǵyn.

Turǵyndar «alǵash ret ákimdikke kómek surap osydan birneshe jyl buryn bardyq» deıdi. Biraq esh nátıje shyqpady. Bul joly da tıisti qujattar jınalǵan. Tipti arnaıy mamandar kelip, qajetti qurylys materıaldaryn túgendep ketken. Alaıda jumystyń naqty qashan bastalatyny ázirge belgisiz.  

«Osy jyldyń tamyz aıynda Qaraǵandy oblystyq Turǵyn úı-kommýnaldyq sharýashylyǵy basqarmasy arqyly nómiri 41-úıdiń shatyryn jóndeý úshin bıýdjetten qarjy bólý josparlanyp otyr. Jóndeý jumystary qazan aıynyń sońyna deıin jalǵasady»,-deıdi Abaı aýdandyq ákimdiginiń bólim basshysy Dıdar Qabaev.  

Jaýapty mekeme ókilderiniń sózine sensek, aldaǵy ýaqytta bir emes, eki úı jóndeledi. Al oǵan bólingen qarajatty turǵyndar keıin qaıtarady. Nesıe retinde bólip tóleıdi. Budan bólek, Abaı qalasynda shatyrynan sý sorǵalap, qabyrǵalary qulaǵaly turǵan ondaǵan úı bar. Ázirge bul baspanalardyń ıelerine qujat jınap, kezegin kútkennen basqa amal joq.