Qaraǵandy oblysynda turǵyn úı qurylysynyń jobalary joq
ASTANA. QazAqparat - Turǵyn úı qurylysy kólemderi boıynsha óńirlik úılespeýshilik baıqalyp otyr. Bul týraly búgin Úkimet otyrysynda «Báıterek» UBH» AQ Basqarma tóraǵasy Erbolat Dosaev málim etti.
«Turǵyn úı qurylysy elimizdiń barlyǵy derlik óńirlerinde júrgizilip jatyr, alaıda qurylys kólemderiniń óńirlik dısproportsııasy baıqalyp otyr. Kelisimsharttar kólemi boıynsha kóshbasshylyq oryndardy Ońtústik Qazaqstan, Qyzylorda, Atyraý, Qostanaı, Mańǵystaý oblystary ıelenýde. 2016 jylǵy aqpanda Ulttyq qordan bólingen qarajat esebinen qarjylandyrylǵan alǵashqy 7 úı Qyzylordada aǵymdaǵy jylǵy qazanda tapsyrylady dep josparlanýda. Bul rette Qaraǵandy oblysynda turǵyn úı qurylysynyń jobalary joq. Ákimdikte qurylys salýshylarmen jumys jınalystary ótkizildi jáne 1,7 mlrd. teńge somasyna memorandýmǵa qol qoıyldy. Qurylys salýshy qujattardy rásimdeýde»,-dedi E. Dosaev.
Munymen qosa, Astana qalasynda da jobalar joq kórinedi. Óıtkeni Qurylys normalary men erejelerine sáıkes, elordada turǵyn úı salý kezinde parkıngterdiń qurylysyn júzege asyrý talap etiledi.
«Qurylys baǵasynyń tómen bolýyna baılanysty (1 sh.m. úshin 200 myń teńgege deıin) qurylys salýshylar tarapynan qyzyǵýshylyq bolmady. Ákimdikte qurylys kompanııalarymen birneshe márte jumys jınalystary ótkizildi jáne 9,6 mlrd. teńgege memorandýmǵa qol qoıyldy»,-dedi ol.
Belgili bolǵandaı, ákimdikpen tıisti kelissózder júrgizilgennen keıin parkıngterdi qurylys salýshylardyń ózderi kommertsııalyq satý quqyǵymen turǵyn úı keshenderi salý oryndylyǵy týraly usynysty qaraý usynylady.
«Bólingen qarajatty alǵashqy paıdalanǵannan keıin, Turǵyn úı qurylysjınaq banki salymshylarynyń qajettilikterine negizdelip, óńirler boıynsha turǵyn úı kólemderin qaıta bólý josparlanýda. Bankte daıyn jınaqtary bar salymshylardyń 50 paıyzynan astamy Astana jáne Almaty qalalarynda shoǵyrlanǵan»,-dedi E. Dosaev.
