Qaraǵandy oblysynda turǵyn úı qurylysy qarqyndaı túsedi
QARAǴANDY. QazAqparat - Qaraǵandy oblysynda úlken qurylys bastalady. Oblys ortalyǵynda ǵana emes, sondaı-aq óńirdiń qalalary men aýdandarynda da turǵyn úıler salý mindeti tur, dep habarlaıdy QazAqparat tilshisi.
Jeńis Qasymbek óz áriptesterin jáne jergilikti qurylys salýshylardy osy baǵytta belsendi jumys isteýge shaqyrdy. Ol úshin búginde elimizde memlekettik qoldaýdyń túrli tetikteri jumys isteıdi. Olardyń sharttary týraly «Báıterek» UBH» AQ men enshiles kompanııalardyń birinshi basshylary aıtyp berdi.
Kezdesý barysynda muǵalimder men dárigerlerdiń turǵyn úı máselesin Qazaqstan ıpotekalyq kompanııasy arqyly sheshýge bolatyn nusqalar usynyldy. «Qazaqstan ıpotekalyq kompanııasy» AQ Basqarma tóraǵasy Ádil Muhamedjanov Qaraǵandy oblysynyń ákimi Jeńis Qasymbekke memorandým jasaýdy usyndy. Osy negizde QIK jańa qurylystarda dárigerler men pedagogtarǵa 200 páter bere alady.
Turǵyn úıge muqtaj adamdardyń tizimin Densaýlyq saqtaý jáne bilim berý basqarmalary qalyptastyratyn bolady. Sodan keıin Qazaqstandyq ıpotekalyq kompanııa úmitkerlerdiń tólem qabilettiligin tekseredi. Mundaı páterdi alý úshin bastapqy jarna qajet emes. Eki bólmeli páter úshin aı saıynǵy tólem somasy 60-tan 70 myń teńgege deıin bolady. Ýaqtyly tólengen jaǵdaıda, 20 jyldan keıin turǵyn úı alýshynyń menshigine ótedi. Páterdi bul merzimnen buryn da satyp alýǵa bolady.
«Bul úlken kómek. Men osy memorandýmdy qoldaıtynymdy aıtqym keledi. Qol qoıaıyq, sharttary óte jaqsy. Jańa úılerdegi eki bólmeli páterlerdiń aýmaǵy 70 sharshy metrge deıin jetedi. Demek, páterdi jaldap turǵannan góri, osy baǵdarlama boıynsha satyp alǵan tıimdirek bolady. Sonymen qatar, memorandým aıasynda turǵyn úı merzimi ótkennen keıin jalǵa alýshynyń menshigine ótedi», - dedi Jeńis Qasymbek.
«Qazaqstannyń turǵyn úı qurylys jınaq banki» AQ Basqarma tóraǵasy Lázzat Ibragımova Qaraǵandy oblysy – «Turǵyn úı qurylys jınaq banki» salymshylarynyń sany boıynsha kóshbasshylardyń biri ekenin habarlady. Tek Qaraǵandyda 97 636 adamnyń depozıtteri bar. Temirtaýda - 5 810 adam, Jezqazǵanda - 8 473 adam, Sátpaev jáne Balqashta – 5000-nan astam salymshy.
Alaıda, onyń aıtýynsha, olardyń kópshiligi turǵyn úıdi ekinshi naryqta satyp alady. Bul, birinshiden, jańa qurylystardaǵy páterlerdiń jetispeýinen, ekinshiden, sharshy metrdiń baǵasy 140 myń teńgeden joǵary bolý sebepti olardy jeńildikti baǵdarlama boıynsha satyp alýǵa jatpaıtynynan.
Bul máseleni sheshý úshin oblys ákimi qurylys kólemin arttyryp, sýbsıdııalaýdyń túrli nusqalaryn oılastyrýdy tapsyrdy. Kelesi jyldyń ózinde paıdalanýǵa berilgen páterler sany osy jylmen salystyrǵanda keminde bir jarym ese ósýi tıis.
«Qajettilik bar, úlken suranys bar. Ákimdik qaraǵandylyqtardy turǵyn úımen qamtamasyz etý úshin qurylys salýshylarmen syndarly jáne ashyq jumys isteýge daıyn. Bul oblystyń basqa óńirlerine de qatysty», - dep atap ótti Jeńis Qasymbek.
Sondaı-aq, oblys basshysy qurylys materıaldary óndirisin ulǵaıtý máselesin de qozǵady. Qaraǵandy oblysynyń aýmaǵynda osyndaı 140 kásiporyn jumys isteıdi. Biraq bul baǵytta odan ári damý áleýeti bar. Aımaq basshysy bızneske damý ınstıtýttarymen birlesip ımport almastyrý boıynsha jumysqa belsendi qatysýdy usyndy. Memlekettik qoldaý quraldary jańa kásiporyndarǵa aıtarlyqtaı qarjylyq kómek kórsetýge múmkindik beredi.
