Qaraǵandy oblysynda «Tuńǵysh Prezıdent jolymen» atty halyq ekspedıtsııasy ótti

QARAǴANDY. QazAqparat – Qaraǵandy oblysynda «Tuńǵysh Prezıdent jolymen» halyq ekspedıtsııasy ótti. Delegatsııa qatysýshylary Elbasynyń eńbek joly bastalǵan Temirtaý men Qaraǵandy qalalarynda bolyp qaıtty. Bul eki shahar kezdeısoq tańdalǵan joq, munda Nursultan Nazarbaev tulǵa retinde kásibı qalyptasqan, dep habarlaıdy QazAqparat tilshisi.

Esterińizge sala keteıik, ekspedıtsııanyń bastamashysy Qazaqstan halqy Assambleıasy boldy. Joba QHA-nyń 25 jyldyǵyna oraılastyrylǵan jáne Táýelsiz Qazaqstandy qurýdaǵy elimizdiń Tuńǵysh Prezıdentiniń eren eńbegin qoǵamdyq sanaǵa bekitýge baǵyttalǵan. Jobanyń nyshany óńirlerge kezekpen kezek berilip otyratyn kúndelik pen tý boldy.

Aktsııa byltyrǵy jyldyń 28 qarashasynda Nur-Sultanda bastaldy. Іs-shara osyǵan deıin Almaty oblysynyń Shamalǵan aýylynda ótti. Qaraǵandy qalasynan ekspedıtsııa Almatyǵa attanady, onda Elbasy jas saıasatkerden táýelsiz memlekettiń Prezıdentine deıingi eńbek jolyn júrip ótti. Jáne de ekspedıtsııa onda bir aı bolady. Sondaı-aq jobaǵa qatysýshylar Ýkraınada Kamenskoe qalasyna (burynǵy Dneprodzerjınsk) barýdy josparlap otyr.

«Bir aı buryn biz Tuńǵysh Prezıdenttiń shaǵyn otany Shamalǵan kentinen estafetany qabyldaǵan bolatynbyz. Ol eldi mekennen Elbasy kezinde myńdaǵan jas mamandarmen birge Qazaqstan Magnıtkasyn salýǵa kelgen. Onyń kýrstastarymen, dostarymen jáne burynǵy áriptesterimen qarym-qatynas jasaı otyryp, Temirtaý, Qaraǵandy turǵyndary úshin jáne jalpy bizdiń óńirimiz úshin 20 jyl ishinde onyń qanshalyqty kóp eńbek jasalǵanyna taǵy da kóz jetkizemin», - dedi Qaraǵandy oblysynyń ákimi Jeńis Qasymbek.

Ekspedıtsııa atrıbýtıkasyn tapsyrý rásimine Almaty qalasy ákiminiń orynbasary Muhıt Ázirbaev, Almaty halqy Assambleıasy hatshylyǵynyń meńgerýshisi Nazar Baǵymbaev, Almaty qalasy ákimi apparatynyń «Qoǵamdyq kelisim» KMM dırektory Shoqan Tájimuratov, Parlament Májilisiniń depýtattary jáne respýblıkalyq jastar uıymdarynyń ókilderi qatysty.

Qazaqstan halqy Assambleıasy tóraǵasynyń orynbasary Janseıit Túımebaev Elbasyna arnalǵan ekspedıtsııa eń tabysty jobalardyń biri ekenin atap ótti.

«Tuńǵysh Prezıdent jolymen» aktsııasy - táýelsizdik jyldary qurylǵan ortaq qundylyqtar negizinde birligimizdi nyǵaıtatyn dúnıetanymdyq joba. Bul Qazaqstannyń barlyq azamattary úshin azamattyq boryshtyń, Otanǵa jáne halyqqa sheksiz qyzmet etýdiń jarqyn mysaly», - dep atap ótti ol.

Ekspedıtsııa qorytyndysy Elorda kúni qarsańynda ótetin halyqaralyq konferentsııada 2020 jyldyń 5 shildesinde shyǵarylady.