Qaraǵandy oblysynda tuqym tazartý jelisi iske qosylady
Tuqymnyń joǵary sapasy – ónimdi eginniń negizi. Bıyl Nura aýdanynyń «Shahterskoe» JShS bazasynda tuqymdardy tazartý jelisin iske qosý josparlanyp otyr. Arnaıy jabdyq tuqymdy kalıbrleýge jáne ony qoqystardan tazartýǵa múmkindik beredi. Jeliniń qýaty saǵatyna 20 tonna bolady.
Jalpy, Qaraǵandy oblysy boıynsha agroónerkásip kesheninde 2023-2026 jyldarǵa 64 joba josparlanǵan.
«Bıylǵy josparda 24 joba bar, onyń ishinde mal sharýashylyǵynda 10 joba, ósimdik sharýashylyǵynda – 11 jáne qaıta óńdeý salasynda – 3. 150-den astam jumys orny ashylady», - deıdi Aýyl sharýashylyǵy basqarmasynyń basshysy Asqar Sanaýbarov.
Óńirde mal sharýashylyǵy ónimderin óndirý kólemin ósirý Shet, Qarqaraly jáne Nura aýdandarynda bordaqylaý alańdaryn, asyl tuqymdy reprodýktorlardy qurý jáne sút-taýar fermalaryn salý esebinen júzege asyrylady dep josparlanǵan. 2026 jylǵa deıin 4,1 myń saýyn sıyry bar segiz STF qurylady. Azyq bazasyn qurý úshin sýarmaly jerlerdiń aýdany 21,8 myń gektarǵa deıin ulǵaıtylady.
Halyqty sapaly ónimdermen qamtamasyz etý úshin, ásirese maýsymaralyq kezeńde saqtaý ınfraqurylymyn damytýǵa kóp kóńil bólinedi. Bıyl Buqar jyraý aýdanynda 7,6 myń tonna kartop qoımasy paıdalanýǵa berildi. Jyl sońyna deıin Osakarov aýdanynda 4,2 myń tonnaǵa jáne Shet aýdanynda 13,4 myń tonnaǵa eki kartop qoımasy salynady. 2026 jylǵa deıin jalpy syıymdylyǵy 49,2 myń tonna bolatyn bes zamanaýı kartop pen kókónis qoımasynyń qurylysy josparlanǵan. Osakarov aýdanynda ımportty almastyrý sharalary aıasynda kóp qabatty zaýyt salynady. Onyń qýattylyǵy – jylyna 4 myń tonna jarma ónimi. Jobany 2025 jyly iske asyrý josparlanyp otyr.
