Qaraǵandy oblysynda tórt jol jabyldy, sońǵy táýlikte jol apaty jıilegen
QARAǴANDY. QazAqparat - Qaraǵandy polıtseıleri aýa raıy buzylýyna baılanysty oblys turǵyndaryna eskertý jasady, dep habarlaıdy QazAqparat.
22 naýryzda sınoptıkterdiń boljamynsha burqasyn kóterilip, qalyń qar jaýady, jel turady. Bul óz kezeginde qala men qala syrtyndaǵy joldarda kólik qozǵalysy kezinde kórý múmkindigin shektep, qozǵalysty qıyndatady.
«Osyǵan baılanysty avtokólik júrgizýshilerinen uzaq saparǵa shyqpaýyn suraımyz, óıtkeni aýa raıynyń kúrt ózgerýine baılanysty joldy qar basyp, apat jaǵdaıy týyndaýy múmkin. Aýa raıynyń nasharlaýyna baılanysty 22 naýryz saǵat 07.30-dan bastap «Jezqazǵan-Petropavl» respýblıkalyq avtojolynyń 65-252 shaqyrymy, Jezdi kentinen Qostanaı oblysynyń shekarasyna deıingi aralyqta kóliktiń barlyq túrine qozǵalys jabyldy. Sosyn saǵat 10.00-den bastap «Ekaterınbýrg-Almaty» respýblıkalyq jolynda (1353-1426 km, Aqmola oblysy shekarasy-Temirtaý qalasy), saǵat 11.15-den keıin «Qaraǵandy-Aıagóz-Buǵaz» tasjoly (Qaraǵandy-Qarqaraly, 17-217 km) jáne «Qyzylorda-Pavlodar» avtojoly (Qaraǵandy-Molodejnyı, 970-1066 km) jabyldy» delingen habarlamada.
Jalpy, ótken táýlikte Qaraǵandy qalasynda 17 jol apaty tirkelgen, onda 11 adam zardap shekken.
«19 naýryzda «Qyzylorda-Pavlodar» tasjolynyń 659-shaqyrymynda 39 jastaǵy júrgizýshi «Toıota Land Krýzer 200» avtokóliginiń artqy dóńgeleginiń jarylýy saldarynan rýldi basqara almaı, aýdarylyp ketken. 26 jastaǵy jolaýshy oqıǵa ornynda, 1987 jyly týǵan ekinshi jolaýshy áıel esin jımastan aýrýhanada kóz jumdy jáne taǵy eki jolaýshy aýyr jaraqatpen Atasý kentindegi aýdandyq aýrýhanaǵa jetkizildi»,- dep habarlady Qaraǵandy oblysy PD jergilikti polıtsııa qyzmeti basqarmasynyń bastyǵy Qýanysh Zarýbaev.
Qaraǵandy oblysynyń PD jergilikti polıtsııa qyzmeti jol erekshe jaýapkershilikti talap etetinin taǵy da eske salady.
Ásirese tótenshe jaǵdaıda júrgizýshiniń jolda jalǵyz qalý qaýpi bar.
