Qaraǵandy oblysynda tazalaý qurylǵylarynyń tozyǵy jetip tur
QARAǴANDY. QazAqparat - Ekologtar Qaraǵandy oblysyndaǵy tazalaý qurylǵylarynyń tehnıkalyq jaǵdaıyn eskirgen dep tanydy, dep habarlady «QazAqparat» HAA tilshisi.
Agenttikke oblystyń ekologııa departamentiniń basshysy Qanat Musaparbekov habarlaǵandaı, tazalaý qurylǵylarynyń paıdalaný merzimi 30-40 jyldan asqan.
«Jabdyqtar men tehnologııa eskirgen. Uzaq ýaqyt jóndeý jumystary júrgizilmegen. Negizgi problema - káriz sýyn tazalaý sapasy», - dedi Musaparbekov.
Aýdandar men qalalardaǵy kommýnaldyq tazalaý qurylǵylarynyń jaǵdaıy alańdaýshylyq týdyrady.
«Barlyq alty keshendi tazalaý qurylǵysy da jóndeý qajet. Normatıvten joǵary las zattar jıi tastalǵany, tazalaý jumystary sapasyz júrgizilgeni baıqaldy. Keı qurylǵylar múldem joq», - dedi Qanat Musaparbekov.
Sátpaev qalasynda sý jabdyqtaýmen aınalysatyn kompanııanyń tazalaý qurylǵylary 1967 paıdalanýǵa berilgen. Olardyń 60 paıyzy eskirgen.
Jezqazǵanda las sý Qara Keńgir ózenine aǵyzylady. Jabdyqtar 80 paıyzǵa eskirgen.
«Balqashta tazalaý qurylǵylarynyń joqtyǵynan tazalanbaǵan káriz sýy qaladan 30 shaqyrym jerde ornalasqan býlandyrý toǵanyna aǵyzylady. Ol Balqash kóline zardabyn tıgizýde», - dedi ol.
