Qaraǵandy oblysynda tártip buzýshy júrgizýshiler negizinen jyldamdyqty asyrǵan
QARAǴANDY. QazAqparat - Respýblıkalyq mańyzy bar «Qyzylorda-Pavlodar» avtojolynyń bóligindegi Saran tas jolynda «Ýragan» avtokesheniniń ýaqytsha polıtsııa beketi ornatyldy, dep habarlaıdy QazAqparat tilshisi.
Respýblıkalyq «Qaýipsiz jol» jedel-aldyn alý is-sharasy aıasynda mobıldik top quramy Qaraǵandy qalasynda jumys istedi.
Іs-sharanyń birinshi kúni jol qozǵalysy erejesin buzýǵa qatysty 540 fakti anyqtaldy. Tártip buzýshy júrgizýshiler negizinen jyldamdyqty asyrǵan. Sonymen qatar, jalǵan nómiri bar avtokólikti basqarý, avtomobıldi zańsyz jabdyqtaý, qarama-qarsy jolaqqa shyǵyp ketý, baǵdarshamnyń tyıym salatyn belgisine ótý jáne kólikti mas kúıde júrgizýge qatysty faktiler tirkeldi.
Bir jyl buryn, 2018 jylǵy 27 shildede vedomstvoaralyq jedel keńeste oblys aýmaǵynda jolaýshylardy, bagajdy zańsyz tasymaldaýdyń jolyn kesý jáne stıhııalyq turaqtardy joıý máselesi qaralǵan. Atalǵan keńeste birqatar tapsyrma berildi. Osyǵan baılanysty, Qaraǵandy oblysy PD Jergilikti polıtsııa qyzmeti basqarmasy jolaýshylar men bagajdy zańsyz tasymaldaýdyń jolyn kesý boıynsha birlesken is-sharalar josparyn ázirledi.
Atalǵan jospardy kóliktik baqylaý ınspektsııasy, Qaraǵandy oblysynyń avtomobıl joldary jáne jolaýshylar kóligi basqarmasy, Qaraǵandy oblysynyń Memlekettik kirister departamenti, Qaraǵandy oblysynyń PD ákimshilik polıtsııa basqarmasy jáne Qaraǵandy kólik prokýratýralary kelisip jáne bekitti.
Atalǵan jospardyń is-sharalaryn iske asyrý úshin mobıldik top quryldy. Qazirgi ýaqytta top músheleri joldaǵy kemshilikter men zań buzýshylardy anyqtaýdy jalǵastyrýda.
