Qaraǵandy oblysynda taǵy bir kún elektr stansasy iske qosyldy
QARAǴANDY. QazAqparat - Qaraǵandy oblysynda kúnnen qýat jınaıtyn elektr stansasy iske qosyldy. Jańartylǵan energııa óndiretin nysannyń ashylý saltanatyna QR Energetıka vıtse-mınıstri Suńǵat Esimhanov qatysty, dep habarlaıdy QazAqparat tilshisi.
Qazaqstannyń energetıkalyq kesheni jańartylatyn energııa kózderiniń taǵy bir nysanymen tolyqty. Ol - Balqash mańyndaǵy Gúlshat kentinde ornalasqan sheteldik ınvestıtsııalarǵa salynǵan kún elektr stansasy.
«Búgin bizdiń oblys úshin mańyzdy kún. Biz ekinshi iri kún elektr stansasyn iske qosyp otyrmyz. Aldymyzǵa úlken maqsat qoıdyq, ol - Elbasynyń tapsyrmasy boıynsha Qazaqstandaǵy balamaly energııa úlesin 30%-ǵa jetkizý. Biz oǵan senimdi túrde qadam basyp kelemiz. Bıylǵy qańtar aıynda Saran qalasynda qýaty 100 MVt bolatyn alǵashqy kún elektr stansasy iske qosyldy. Bul - Ortalyq Azııadaǵy eń iri kún stansalarynyń biri. Qazir biz «Gúlshat» KES-yn ashyp jatyrmyz. Maýsym aıynda taǵy bir stansany Shet aýdanynda iske qosýdy josparlap otyrmyz», - dedi Qaraǵandy oblysynyń ákimi Erlan Qoshanov nysandy iske qosý rásiminde. 
Gúlshattaǵy kún elektr stansasy bir jylǵa jetpeı salynyp bitken. 104 gektar jerde 120 myńnan astam panel ornalasqan. Qýaty 40 MVt quraıtyn stansa Balqash sııaqty 5 qalany energııamen qamtamasyz etýge qaýqarly. Jyl saıyn ol 58 mln kV/saǵ astam elektr energııasyn óndiretin bolady.
QR Energetıka vıtse-mınıstri Suńǵat Esimhanov atap ótkendeı, Qaraǵandy oblysy - balamaly energetıkany damytýda elimiz boıynsha kóshbasshy. Qazaqstanda jańartylatyn energııa kózderin óndirý kóleminiń jartysy Qaraǵandy óńirine tıesili.
Stansa qurylysy men jabdyqtaryna 46 mln AQSh dollary jumsaldy. Bul - sheteldik ınvestıtsııa. Qurylys kezinde nysanǵa 300 adam jumysqa alyndy. Stansada 20 maman qyzmet kórsetetin bolady.
Joba ınvestorlary Qaraǵandy oblysynyń basshylyǵyna qolaıly jaǵdaı jasaǵany úshin alǵys bildirdi. Kompanııa budan keıin de óńirdegi ınvestıtsııalyq jobalardy júzege asyrýǵa qatysýdy josparlap otyr.
Kún elektr stansasynyń ashylý saltanatyna Eýropa Qaıta Qurý jáne damý bankiniń ókilderi, qazaqstandyq kún energetıkasy qaýymdastyǵynyń ókilderi, ardagerler, Balqash qalasynyń qurmetti azamattary, «Jasyl ekonomıka» baıqaýynyń jeńimpazdary qatysty.
