Qaraǵandy oblysynda taǵy bir aýyldy sý basty
QARAǴANDY. QazAqparat - Qaraǵandy oblysynda taǵy bir aýyldy sý basty, dep habarlaıdy «QazAqparat» HAA tilshisi.
«17 sáýir kúni Nura aýdanynyń Tassýat aýylynda Nura ózeniniń sý deńgeıi kóterilip, 10 úıdi sý basty. Halyqty qyzyl sýdan qorǵaý maqsatynda 56 adam aldyn ala týystarynyń úıine evkýatsııalandy. Kóshirý jumystaryna 69 adam jáne 36 tehnıka jumyldyryldy», - dep habarlady Qaraǵandy oblysy TJ departamentiniń baspasóz qyzmeti.
Qazirgi ýaqytta Qaraǵandy oblysynyń eldi mekenderinde sý tasqynyna qarsy jáne apattyq-qutqarý jumystary jalǵasýda. Ásirese Buqar jyraý, Qarqaraly, Abaı, Shet jáne Nura aýdandarynyń eldi mekenderi erekshe baqylaýǵa alyndy.
Jalpy sý tasqyny ýaqytynda erigen qar sýyn jiberý jáne eldi mekenderdi qorǵaý úshin 17,415 shaqyrymnan astam qorǵanys bógeti turǵyzyldy, 35 100 qum qaptaldy, 1 264,5 tekshe metrden astam sý sorǵyzyldy.
Oblys boıynsha jeke quramnan 2 503 adam, 746 dana tehnıka, 7 sý sorǵyzý qurylǵysy jáne 29 qaıyq apattyq-qutqarý jáne jedel jumystarǵa jumyldyryldy.
Sý deńgeıiniń túsýine baılanysty buryn evakýatsııalanǵan Aqtóbe aýylynyń 62 turǵyny jáne Andreınıkovka aýylynyń 10 turǵyny óz úılerine oraldy.
Sý tasqynyna qatysty jaǵdaı baqylaýǵa alynǵan.
