Qaraǵandy oblysynda sybaılas jemqorlyqpen kúres qalaı júrgiziledi

QARAǴANDY. QazAqparat – Qaraǵandy oblysynyń sybaılas jemqorlyqqa qarsy qyzmeti paraqorlyqpen qalaı kúresýdiń birneshe nusqasyn usyndy. Tujyrymdamany talqylaý úshin óńir basshysy Jeńis Qasymbekpen kezdesýge bıznes-qoǵamdastyq, úkimettik emes uıymdar, memlekettik organdar jáne depýtattar shaqyryldy, dep habarlaıdy QazAqparat tilshisi.

Bul salada oblys qandaı ózgerister kútip turǵany jaıly oblystyq sybaılas jemqorlyqqa qarsy qyzmet basshysy Denıs Shakenov baıandap berdi.

Agenttik búginde sybaılas jemqorlyqqa qarsy saıasat tujyrymdamasynyń jobasyn jáne ony iske asyrý jónindegi is-qımyl josparyn ázirledi. Negizgi baǵyttardyń ishinde memlekettik satyp alý salasyndaǵy sybaılas jemqorlyq táýekelderin tómendetý, Bıznestiń parasattylyǵy jáne ekonomıkaǵa memlekettiń qatysýyn tómendetý ataldy.

«Bıznes-ortada ashyqtyq pen jaýapkershilikti arttyrý, korporatıvtik sybaılas jemqorlyqty azaıtý úshin bıznes-tizilimdi engizý qajet. Bul kásipkerlik sýbektileri týraly, onyń ishinde olardyń parasattylyǵy men senimdiligi turǵysynan jan-jaqty málimetterdi jınaqtaýǵa múmkindik beretin ashyq ıntegratsııalanǵan derekter bazasy. Osylaısha, adal kásipkerler sybaılas jemqorlyq táýekelderinen qorǵalady», – dedi Denıs Shakenov.

Agenttik baǵdarlamany iske asyrýdyń úsh nusqasyn usyndy. Olardyń birinshisi – bızneske sybaılas jemqorlyqqa qarsy standarttardy erikti túrde engizý. Buǵan jaýap retinde kompanııalar memleket tarapynan jeńildikter men basqa da qoldaý sharalaryn alady. Kelesi nusqa – sharalardy oryndamaǵany úshin jaýapkershilikti belgileı otyryp, sybaılas jemqorlyqqa qarsy standarttardy mindetti túrde engizý. Sońǵysy – túbegeıli. Ol memlekettik jáne jeke sektorlar úshin sybaılas jemqorlyq zańnamasyn saqtaý boıynsha biryńǵaı talaptar men quqyqtyq saldarlardy kózdeıdi.

Kásipkerler ómirden mysaldar keltire otyryp polıtsııa, medıtsına, sot, qurylys jáne basqa da salalardaǵy sybaılas jemqorlyq quramdastary týraly aıtyp berdi. Sybaılas jemqorlyqqa qarsy is-qımyl júıesin, memleket pen bıznestiń ózara is-qımylyn odan ári jetildirý jóninde birqatar usynystar aıtyldy.

«Sybaılas jemqorlyqqa qarsy saıasattyń jańa tujyrymdamasynda jurtshylyqtyń, atap aıtqanda, kásipkerlerdiń pikirin eskerý óte mańyzdy. Biz bızneske sybaılas jemqorlyq kedergilerine tap bolǵan kezde kásipkerlikti qoldaýdyń eshqandaı sharalary tıimdi bolmaıtynyn túsinemiz», – dedi Jeńis Qasymbek.