Qaraǵandy oblysynda sýarmaly jerdi qalpyna keltirý jumystary júrip jatyr
Aýyl sharýashylyǵy kásiporyndary jeti jobany iske asyrýda. Ol úshin sý resýrstaryn utymdy paıdalaný qajet.
«Qaraǵandy oblysynda aýyl sharýashylyǵy taýarlaryn óndirýshilerge alqaptaryn sýarý úshin sý beretin úsh uıym jumys isteıdi – «Kazvodhoz» RMK, Q.Sátbaev atyndaǵy kanal, «Krasnaıa polıana» ÁKK. Sonymen qatar «Qaraǵandy sý qoımalary» KMK-de sýarmaly jerge sý berý máselesi pysyqtalýda. «Kazvodhoz» RMK-nyń sýdy jumsaý jáne bólý esebin tıimdi júrgizý úshin sandyq tehnologııalar engizildi. GSM-modemderi bar 11 beket ornatyldy», – dep habarlady Tabıǵı resýrstar jáne tabıǵat paıdalanýdy retteý basqarmasynyń basshysy Nurbek Serikov.
Onyń aıtýynsha, sý resýrstaryn esepke alý júıesin jańǵyrtý josparlanǵan.
Budan basqa, osy jyly Saran jáne Shalǵy sý qoımalary, Manaq bógeti kúrdeli jóndeýden ótedi. Sondaı-aq, Nura, Solonka jáne Aqbastaý ózenderin sanatsııalaý boıynsha bes jobany iske asyrý josparlanǵan.
Basqarma basshysynyń aqparaty boıynsha, óńirde úsh jańa sý qoımasyn salýǵa TEN (tehnıko-ekonomıkalyq negizdeme) ázirlenýde. 2023-2024 jyldary oblysta «Jasyl Qazaqstan» ulttyq jobasy boıynsha 73 shaqyrym sýarý kanalyn qaıta jańartý josparlanýda.
Bul jobalardy júzege asyrý sýarmaly eginshilikti keńeıtýge baǵyttalǵan.
Aýyl sharýashylyǵy basqarmasynyń basshysy Asqar Sanaýbarov sýarmaly sýdy únemdeýge múmkindik beretin tehnologııa týraly aıtyp berdi. Aýylsharýashylyq kásiporyndary zamanaýı búrký qondyrǵylaryn satyp alady. Memleket jabdyq qunynyń jartysyn sýbsıdııalaıdy. Sonymen qatar, sýarmaly sýdy jetkizýge sýbsıdııa tólenedi.
«Jumys istep turǵan sý qoımalaryn qaıta jańartý sýarmaly sýdyń qosymsha kólemin qamtamasyz etýge múmkindik beredi. Turaqty sýarý kezinde shyǵyndy azaıtý esebinen qoldanystaǵy sý balansyn barynsha saqtaý qajet», – dep atap ótti oblys ákimi Jeńis Qasymbek.
