Qaraǵandy oblysynda sý tasqynyna qatysty ótken jylǵy vıdeolardy taratýshylar jazalanady
ASTANA. QazAqparat - Polıtsııa qyzmetkerleri ótken jylǵy sý tasqynyna qatysty vıdeo materıaldardy dál qazirgi ýaqytta oryn alyp jatqandaı beınelep, jalǵan pikirlermen taratýshylarǵa qylmystyq jaýapkershilik júktelýi múmkin ekendigin eskertedi, dep habarlaıdy QazAqparat.
«Ótken jylǵy sý tasqynyna qatysty materıaldar áleýmettik jelide taraýda. Vıdeoda Ǵabıden Mustafın aýylyn sý basqandyǵy jaıynda aıtylady. Bul shyndyqqa janaspaıdy. Beıne jazba 2015 jylǵy sý tasqyny kezinde Mustafın eldi mekeniniń Fýtbol kóshesinde túsirilgen. Qazirgi jaǵdaıda bul kadrlardyń eshqandaı qatysy joq», - dep málim etti Qaraǵandy oblysynyń ákimdiginen.
Oblys ákimdiginiń baspasóz qyzmeti aýyldaǵy shynaıy jaǵdaıdy vıedokameraǵa túsirgen. Ol jazbadan aýylda eshqandaı sý tasqyny joq ekendigin kórýge bolady. Aýyl joldary qurǵaq, tek erigen qardyń sýlaryn ǵana baıqaýǵa bolady.
Osyǵan oraı polıtsııa qyzmetkerleri ótken jylǵy vıdeo materıaldardy taratý qylmystyq jaýapkershilikke túrtki bolatyndyǵyn eskertedi.
«Azamattardan tekserilmegen aqparattardy áleýmettik jelide taratpaýdy ótinemiz. Zańda jalǵan aqparatty taratýǵa qatysty QK 274 baby boıynsha qylmystyq jaýapkershilik kózdelgen», - dep habarlady oblystyq ishki ister departamentiniń baspasóz qyzmetinen.
Al Qaraǵandy oblystyq tótenshe jaǵdaılar departamenti baspasóz qyzmetiniń aqparatynsha, qazirgi ýaqytta óńirdegi sý tasqyny protsesi baıaýlap keledi.
«Mustafın aýyly ornalasqan Buqar jyraý aýdanynda sý tasqyny jáne aýlalardy sý basý oryn alǵan emes. Óńirdegi eń iri Nura ózeninde kerisinshe sý deńgeıiniń 40 santımerge tómendeýi baıqalady», - dedi departamentten.
