Qaraǵandy oblysynda sý tasqynyna qarsy shtab táýlik boıy jumys isteıdi
QARAǴANDY. QazAqparat – 20 naýryzdan bastap Qaraǵandy oblysynda sý tasqynyna qarsy shtab jumys istep tur. Jaǵdaı táýlik boıy baqylaýda. Aımaqtaǵy sý tasqyny jaǵdaıy týraly tikeleı efırdegi brıfıngte oblys ákiminiń orynbasary Ermek Alpysov pen tótenshe jaǵdaılar departamentiniń bastyǵy Murat Qatpanov baıandady, dep habarlaıdy QazAqparat tilshisi.
«Qazirgi ýaqytta oblysta sý tasqyny jaǵdaıy turaqty. Turǵyn úıler men tas joldardy sý basý jaǵdaılary tirkelgen joq. Qazgıdromettiń habarlaýynsha, qar qorynyń azaıýy Nura jáne Sherýbaı-Nura ózenderiniń basseınderinde baıqalady. Іri sý qoımalarynyń jaǵdaıy da turaqty. Samarqan jáne Yntymaq sý qoımalarynda tasqyn sýlardy qabyldaýǵa jetkilikti kólem bar. Kosmomonıtorıng kórsetkendeı, qazirgi ýaqytta oblys aýmaǵynyń shamamen 50% -y qarmen jabylǵan», - dedi Ermek Alpysov.
Onyń sózinshe, eldi mekenderden shamamen 2 mıllıon tekshe metr qar shyǵarylǵan. Bul jumystar jalǵasýda.
Avtomagıstraldardaǵy sý ótkizgishter men kópirlerdi tazalaý jumystary aıaqtalýǵa jaqyn. Ózenderde muz qopsytý jáne jarý jumystary júrgizilýde.
Sý tasqyny qaýpi bar eldi mekender men jol ýchaskeleri baqylaýǵa alyndy, dep atap ótti oblys ákiminiń orynbasary.
Eskertý júıeleriniń daıyndyǵy tekserildi.
Tótenshe jaǵdaılar departamenti basshysynyń aıtýynsha, búgingi kúni sý tasqynyna qarsy oblystyq shtabqa aýlalardy sý basý qaýpi týraly 26 habarlama túsken.
Onyń kópshiligi Qaraǵandyda. Barlyq jaǵdaıda jedel asqynýlardyń aldyn alý boıynsha sharalar qabyldandy.
«Tótenshe jaǵdaılar departamentinde alty jıyntyq top quryldy jáne olar únemi arnaıy daıyndyqta, qajetti arnaıy jabdyqtarmen jabdyqtalǵan. Jedel toptar sý tasqyny qaýpi bar eldi mekenderge aınalma joldar jasaıdy. Turǵyndarmen 1200-den astam jıyn, 300-den astam reıdtik sharalar ótkizildi», - dedi Murat Qatpanov.
Spıkerler jeke sektor turǵyndaryn óz aýmaqtaryndaǵy qardy tazalaýǵa ýaqytynda áreket jasaýǵa shaqyrdy.
