Qaraǵandy oblysynda sý tasqynyna qarsy sharalarǵa 2,25 mlrd teńge bólindi
QARAǴANDY. QazAqparat - Ǵ.Mustafın atyndaǵy kentte búgin jyljymaly jınalys ótti. Onda kóktemgi sý tasqynyna daıyndyq talqylandy, dep habarlaıdy Qaraǵandy oblysy ákiminiń resmı saıty.
Oblys ákiminiń orynbasary Anatolıı Shkarýpa qıraý jaıttaryn boldyrmaý úshin qandaı sharalar qoldanylatyny týraly aıtyp berdi.
- Bizde birqatar sharalar josparlanyp qoıdy. Birinshisi, ol - myna ótkeldi buzý, - dep málimdedi Anatolıı Shkarýpa. - Biz bul problema týraly ótken jyldan beri bilemiz, Nura ózenindegi jaǵdaıdy kórip otyrmyz.
Oblys ákiminiń orynbasary aıtqan ótkel Temirtaý men Ǵ.Mustafın kentiniń aralyǵyndaǵy jolda ornalasqan.
- Bul jolmen halyq ótetinin eskere otyryp, biz mundaǵy jumysty shegerip otyrdyq. Alaıda qazir, aqpannyń sońynan naýryzdyń basyna deıin bul ótkeldi buzýymyz qajet. Negizgi arnany buzatyn bolamyz, - dedi Anatolıı Shkarýpa.
Ol kóktemde erigen qar sýy bul ótkeldiń saldarynan kenttiń ishine aǵýy ábden múmkin dep túsindirdi. Bul qaýiptiń aldyn alý úshin bógetti joıý qajet.
Bıylǵy jyly kóktemgi sý tasqynynyń aldyn alý sharalaryna bıýdjetten 2 mlrd 250 mln teńge qarastyrylǵan eken. Bul qarajatqa sý tasý qaýpi bar ózenderdi tazartý jáne arnalaryn túzeý kózdelgen.
Oblysta qazirdiń ózinde basqalardan erekshe sý tasqyny qaýpine ıe eldi mekenderdiń mańdarynda 25 shaqyrym bógetter salynǵan. Olar Buqar Jyraý, Qarqaraly, Nura aýdandarynda ornalasqan. «Jol kartasy» sheńberinde bul úıindiler 6 aýyl men kentterde salynǵan, sonymen qatar qosymsha 7 eldi mekende jol kartasynan tys salyndy.
Anatolıı Shkarýpa sondaı-aq aldaǵy kóktemge qatysty sınoptıkterdiń aldyn ala boljamdaryn aıtyp ótti.
- Ázirge Kazgıdromettiń málimetteri boıynsha boljamdar jaqsy. Biraq biz qaıtsek te eń qaýipti jaǵdaılarǵa daıyn bolýymyz kerek. Ol úshin oblys boıynsha birqatar sharalar ótkizip jatyrmyz, jáne de kóptegen sharalar sý tasqyny bastalarda ótkiziledi. Eń basty mindetterdiń biri sý ótkizý qubyrlaryn tazartý bolyp tabylady.
Qaraǵandy oblysynda 262 gıdrotehnıkalyq qurylystar baqylanady. Olardyń barlyǵy qaýiptilik deńgeıi boıynsha bólingen. Anatolıı Shkarýpa Kókpektidegi sý bógeti týraly da eske saldy. Ol sál zaqymdalǵan bolatyn, alaıda esh qaýip tóndirmeıdi, sý qoımasy tolyǵymen tranzıttik rejimde jumys istep tur. Erekshe nazardy qajet etetinder ol sý qory bar gıdrotehnıkalyq qurylystar bolyp tabylady.
Qazirgi tańda respýblıkalyq baǵdarlama boıynsha Qaraǵandy oblysynda qosymsha 4 sý qoımasynyń qurylysy jobalanýda. Olardyń ekeýi Qarqaraly aýdanynda, jáne bir-birden Osakarov jáne Buqar Jyraý aýdandarynda. Bul nysandar kóktemgi sý aǵysyn bógeý úshin qajet.
