Qaraǵandy oblysynda sý tasqynyna daıyndyq kúndelikti baqylaýda - ákim
QARAǴANDY. QazAqparat - Qaraǵandy oblysynda sý tasqynynyń aldyn alý boıynsha is-sharalar jospary jumys isteıdi. Qaýipti aımaqta ornalasqan barlyq eldi mekenderdiń daıyndyq qujattary tekserildi. Aldyn alý sharalaryn ótkizý týraly aımaq basshysy Jeńis Qasymbek halyqpen eseptik kezdesýinde aıtyp berdi, dep habarlaıda QazAqparat tilshisi.
«Jalpy oblysta tórt jyl ishinde 190 shaqyrym qorǵanys bógeti salyndy, 62 shaqyrym ózen arnasynda ınjenerlik is-sharalar júzege asyryldy. Barlyq gıdroqurylys erekshe baqylaýda. 2018 jáne 2019 jyldary bul nysandarda 1,3 mlrd teńgege jóndeý jumysy júrgizildi», - dedi oblys ákimi.
Sondaı-aq, qulaqtandyrý júıesiniń jumysyna tekserý júrgizildi, materıaldyq-tehnıkalyq quraldar - JJM, ınertti materıaldar jáne t. b. qory tekserildi.
Qazir qar shyǵarýǵa basa nazar aýdarylýda. Jaýapty qyzmetterdiń aqparaty boıynsha, búgingi tańda oblystyń qalalary men aýyldarynan 1 mıllıon tekshe metrden astam qar shyǵaryldy.
«Samarqand jáne Yntymaq sý qoımalarynan sý jiberiledi. Bul jumys áli de jalǵasady. Sý tasqyny bastalǵanǵa deıin kólemdi eń tómengi deńgeıge jetkizemiz. Sý tasqynyna daıyndyq kúndelikti baqylaýda», - dep atap ótti Jeńis Qasymbek.
