Qaraǵandy oblysynda sý tasqynyna daıyndyq barysy qalaı

QARAǴANDY. QazAqparat – Qaraǵandy oblysynda aldaǵy sý tasqynyna daıyndyq bastaldy. Qańtar aıynda qar qalyńdyǵyn anyqtaý úshin ózenderdiń joǵarǵy aǵysyn aralaý jumystary bastaldy. Táýekel aımaqtaryndaǵy barlyq gıdroqurylystar men eldi mekender erekshe baqylaýǵa alynady. Sý tasqynynyń aldyn alý maqsatynda Nura ózeniniń birneshe ýchaskesin sanatsııalaý kózdelgen, dep habarlaıdy QazAqparat tilshisi.

Oblys ákimdiginde ótken onlaın-keńeste eldi mekenderdi tasqyn sýdan qorǵaý sharalary talqylandy.

Daıyndyq barysy týraly óńir basshysy Jeńis Qasymbekke basqarmalar men vedomstvolardyń basshylary, qalalar men aýdandardyń ákimderi baıandady.

«Sý tasqynyna daıyndyq boıynsha tájirıbelik is-sharalar respýblıkalyq jol kartasy jáne oblystyq ınjenerlik jumystar jospary sheńberinde júrgiziledi. Jol kartasynyń 16 is-sharasynyń 9-y tolyq oryndaldy. Aýyldardyń janynda qorǵanys bilikteri turǵyzylyp, nyǵaıtyldy. Osakarovka – Ozernoe avtomobıl jolynda sý ótkizý qubyry aýystyryldy. Jarly ózeniniń arnasyn tazartý jáne tereńdetý, Sherýbaı-Nura ózeniniń arnasyn sanatsııalaý júrgizildi», – dep habarlady Qaraǵandy oblysy TJD bastyǵy Murat Qatpanov.

Onyń aıtýynsha, Nura jáne Soqyr ózenderi arqyly ótetin Novodolınka – Shahan – Molodetskoe avtojolyndaǵy eki kópirdi qaıta jańartýdy aıaqtaý qajet.

Sonymen qatar, Nura ózeniniń sanatsııasy Chkalovo jáne Sadovoe aýyldarynyń, Buqar Jyraý aýdanynyń Ǵ. Mustafın kentiniń, sondaı-aq Nura aýdanynyń Tassýat jáne Maıorovka aýyldarynyń janynda josparlanǵan.

Oblysta 2015–2021 jyldar aralyǵynda úlken jumys atqaryldy, dep atap ótti TJD basshysy. 253 km qorǵanys bógetteri men bilikteri salynyp, bekitildi, jaǵalaý nyǵaıtyldy, ózenderdiń túbi tereńdetildi, jalpy 102 km qashyqtyqta ózen arnalary tegisteldi. Bul sharalarmen 178 eldi meken qamtyldy.

Jol kartasy men ınjenerlik jospardy júzege asyrý jalǵasýda.

Dástúr boıynsha, 1 naýryzdan bastap olar sý qubyrlary men kópirlerdi tazartýǵa kirisedi.

Jeńis Qasymbek sý tasqynynan qorǵaý sharalaryn ýaqytyly qamtamasyz etý jóninde tapsyrma berdi.

«Qalalar men aýdandarda qazirdiń ózinde qar shyǵarý jumystaryn bastaý kerek. Qarajat bólińizder, kásiporyndardy tartyńyzdar. Munyń bári sý obektileri men ınfraqurylymdy daıyndaýǵa, is-qımyldardyń úılesimdiligine, materıaldyq-tehnıkalyq jaraqtandyrýǵa baılanysty. Sý qoımalaryn daıyndaýǵa basa nazar aýdaryp, árbir gıdroqurylysqa baqylaýdy qamtamasyz etý qajet», – dep atap ótti óńir basshysy.

Keńeste sondaı-aq azamattyq qorǵaý júıesi jumysynyń nátıjeleri men aldyn alý sharalaryn kúsheıtý talqylandy.